Романија деновиве ќе биде домаќин на значаен духовен настан, откако чесната глава на светиот великомаченик Георгиј Победоносец за првпат ќе биде донесена од Света Гора во оваа православна земја. Светињата ќе пристигне на 22 април и ќе остане на поклонение до 28 април во манастирот „Пантократор“ во округот Телеорман, на југот од Романија.
Според романската црковна агенција Basilica, чесната глава ќе биде донесена од атонскиот манастир Ксенофонт, а делегацијата од Света Гора ќе ја предводи архимандритот Алексиј, игумен на манастирот. Истите податоци ги пренесоа и Agerpres и Orthodox Times, кои нагласуваат дека станува збор за прво вакво доаѓање на оваа светиња на романско тло.
Донесувањето на светињата е поврзано со храмовата слава на манастирот „Пантократор“, кој годинава повторно ќе ја одбележи со особена свеченост. Според најавите, за време на деновите на поклонението се очекуваат илјадници верници од цела Романија, а локалните црковни претставници веќе ги повикаа верниците да се подготват духовно за овој настан. Во таа насока, архимандритот Серафим Бациу, административен викар на Епархијата Александрија и Телеорман, го нарече свети Георгиј „образец на вера и сведоштво, особено за младите“.
Во претходните најави, игуменот Алексиј од Ксенофонт истакна дека доаѓањето на чесната глава на свети Георгиј е голем благослов за романскиот народ и духовна можност за молитвено приближување кон еден од најпочитуваните светители во православниот свет. Според Orthodox Times, тој им порачал на верниците дека ќе примат духовна радост доколку со љубов и вера му пристапат на свети Георгиј. Настанот има и поширока духовна и историска тежина, бидејќи врските меѓу Романија и Света Гора се длабоки и повеќевековни. Токму затоа донесувањето на оваа светиња од Атон во Романија се доживува не само како исклучителен поклонски настан, туку и како силен израз на духовното единство меѓу романското православие и светогорското монаштво.
Извор: Vima orthodoxias
