Поранешниот градоначалник на Скопје, Трифун Костовски, во својата најнова колумна „Малта и Матка – две приказни и две судбини“ отвора прашање за пропуштените можности на Македонија, со посебен акцент на потенцијалот на кањонот Матка како духовна и туристичка дестинација.
Инспириран од примерот на Малта, Костовски прави паралела меѓу развојот на оваа мала островска држава и состојбите во Македонија. Тој посочува дека Малта, иако територијално многу помала, за само неколку децении успеала да изгради стабилен систем и силна туристичка економија, привлекувајќи стотици илјади странски работници и посетители.
Од друга страна, Македонија, според него, и покрај богатата историја и природни ресурси, не успева да создаде јасна визија за сопствениот развој.
„Имаме сѐ, а како да немаме ништо. Тоа е наша трагедија“, наведува Костовски во колумната .
Тој ја критикува економската политика која, наместо да се потпира на домашните потенцијали како земјоделството, сточарството и туризмот, се ориентира кон привлекување странски инвеститори кои ги опишува како „модерни номади“, без долгорочен придонес за државата.
Запоставено богатство
Посебен дел од колумната е посветен на културното наследство, кое според Костовски останува недоволно искористено и слабо промовирано. Како пример го наведува делото на академикот Цветан Грозданов за црквата Свети Ѓорѓи Курбиново, кое, како што посочува, во Македонија останува заборавено, додека во странство доживува повеќекратни изданија и интерес.
Дополнително, тој нагласува дека цели региони, како Преспа, се „длабоко закопани“ кога станува збор за нивната промоција и валоризација.
Визијата за Матка
Најсилната порака во колумната се однесува на Кањон Матка, за кој Костовски открива дека уште за време на неговиот мандат (2005–2009) имал конкретна визија за негов развој.
Според неговите сознанија, во кањонот постојат 11 манастири и остатоци од уште 64 урнисани светилишта, чии темели и денес се видливи.
„Кањонот Матка може да биде нова ‘Света гора’ во православието“, истакнува тој .
Планот, како што објаснува, вклучувал обнова на манастирите, ангажман на Македонска православна црква – Охридска архиепископија и Македонска академија на науките и уметностите, како и изградба на инфраструктура – жичарници, мостови и пристапни патишта, со цел кањонот да стане достапен и атрактивен за посетителите.
Воедно, предвиден бил и систем за заштита на уникатната флора и фауна на овој простор.
Нереализирана идеја
Сепак, по завршувањето на неговиот мандат, Костовски тврди дека проектот не добил продолжение.
„Мојата идеја за кањонот Матка остана во мојата ‘Бела книга’, која за жал беше уништена од моите наследници“, наведува тој .
Порака за иднината
Во заклучокот, Костовски испраќа силна порака дека без јасна визија и стратегија, Македонија ќе продолжи да стагнира.
Тој повикува на враќање на достоинството преку сопствен развој и промоција на домашните вредности, наместо зависност од надворешни фактори.
„Малта е мала држава со голема визија, а Македонија – голема историја без иднина“, заклучува Костовски .
Колумната ја отвора дебатата за тоа дали Македонија конечно ќе почне да ги препознава и развива сопствените потенцијали – или ќе продолжи да ги пропушта шансите кои ги има пред себе.
Целосна колмна на:
https://www.facebook.com/share/p/18LQKPfgS3Извор: Фејсбук профил на Трифун Костовски
