Протоѓакон Андреј Кураев: „Оваа војна се потпира на пропаганда и безбожна омраза“
Руско-украинската војна, според зборовите на познатиот руски богослов, философ и јавен деец протоѓаконот Андреј Кураев, е „најсрамната војна во историјата на човештвото“.
Во интервју за изданието Witnesses, Кураев — кој е отстранет од служба во Руската православна црква — остро ја разобличи идеолошката и црковната поддршка на агресијата, што доаѓа од самата Московска патријаршија и нејзиниот поглавар, патријарх Кирил.
„Првата руска војна без покајание“
Кураев истакнува дека ова е првата војна во историјата на Русија во која нема ни најмало чувство на покајание, ниту пак збор за сопствените гревови:
„Тие (патријархот Кирил и неговиот клир) зборуваат за гревовите на Украинците, на ‘геј-Европа’, но не зборуваат за своите.
Воведена е забрана за духовна рефлексија. Ова е најсрамната војна во историјата на човештвото. Таа се потпира на пропаганда — и црковна, и државна — во која главниот непријател е ‘колективниот Запад’, бидејќи, наводно, тој е хомосексуален.
Ако се откажеме, ќе ни ги наметнат нивните бракови. Тоа е пропаганда од најниско ниво, што го понижува народот не помалку од воените злосторства.“
„Химера на лажна величина“
Кураев потсетува дека руската пропаганда постојано зборува за „одбрана на рускиот јазик и православието“, додека во реалноста фронтот е мртва зона, како што сведочи и украинскиот генерал Валериј Залужни:
„Современиот фронт е мртва зона: дронови палат села, шуми, луѓе.
Кого, всушност, ослободувате? Од кого?
Да ја изгорите земјата и да пристигнете како ‘ослободители’? Тоа е химера на национална величина што не раѓа ништо, освен пустош и смрт.
За таа химера убивате и туѓи, и свои деца,“ вели Кураев.
„Црквата како додаток на државните безбедносни и репресивни органи“
Говорејќи за патријархот Кирил, Кураев забележува дека неговото властољубие и стремежот да ја претвори Црквата во продолжена рака на државните безбедносни и репресивни органи се веќе очигледни:
„Во секоја своја проповед Кирил вметнува молитва за претседателот — нешто што не го бара ниту црковниот устав, ниту самиот претседател.
Зошто тоа? За што служи таа демонстративна покорност?“
„Не е личен грев, туку системска болест“
Протоѓаконот нагласува дека не треба да се гледа на војната како на личен грев на патријарх Кирил, туку како на длабока системска деформација:
„Некои либерални свештеници во емиграција велат дека ова е негов личен грев.
Јас велам — не. Проблемот не е во личностите, туку во матрицата, во културните и духовни модели што се вградени во секоја црква која сака да стане државна.
Таа секогаш мора да плаќа — со лојалност кон јавното мислење и кон волјата на власта.“
Извор: Україна Православна (uaorthodox.com)
