„Како што оној што без водач лесно го губи патот, дури и ако е многу мудар, така и оној што оди по монашкиот (и брачниот) пат без духовно раководство лесно може да залута, дури и ако ја поседува целата мудрост на светот.“
(Свети Јован Лествичник)
„Ако човек не се потчини на духовен отец, по примерот на Христос Кој бил послушен до крсна смрт кон Својот Отец, нема ни духовно да се препороди. Оној кој не станал возљубен син на добар духовник и така не се препородил преку Словото и Духот, како ќе стане самиот добар татко на добри чеда и како ќе роди добри духовни деца? Бидејќи, какво е дрвото, таков ќе биде и плодот.“
(Свети Никита Ститат)
„Бидете послушни и покорувајте им се на своите духовни отци, зашто тие бдеат над вашите души како луѓе кои ќе дадат одговор за вас. Советувај се и остани послушен до крај на своите духовни отци, за да се спаси твојата душа и да станеш наследник на вечните и нетлени добра. Затоа слушај ги без противење, за да не загине твојата душа.“
(Свети Григориј Палама)
„Не прифаќај осуди против својот духовен отец, ниту поддржувај го оној што го навредува, за Господ да не се разгневи поради твоите дела и да не те оттурне од земјата на животот.“
(Свети Максим Исповедник)
„На оној што му противречи на својот духовен отец му се радуваат демоните. А на оној што се смирува до смрт, му се восхитуваат ангелите. Зашто тој врши божествено дело, станувајќи сличен на Синот Божји, Кој бил послушен на Својот Отец до смрт, и тоа смрт на Крст.“
(Свети Симеон Нов Богослов)
„Со сета сила на својата душа почитувај го духовниот отец и не ги престапувај заповедите на оној што те родил во Господа, бидејќи така злите демони нема да те победат.“
(Свети Ефрем Сирин)
„Ако седиш покрај голем старец, не зборувај само за неговите добродетели, туку подражавај го и неговиот живот, бидејќи тоа ќе ти донесе полза. Покажи ја блискоста со него не само со зборови, туку и со дела.“
(Свети Ефрем Сирин)
„Духовникот треба да се стави на местото на секој што се исповеда и да ја почувствува неговата болка, така што човекот што се исповеда да ја види сопствената болка на неговото лице. Во наше време луѓето имаат потреба од малку свежа вода, а не од силен оцет. Затоа духовникот треба да постапува со снисходливост и да им зборува на луѓето со љубов за големата Божја љубов, за тие самите да се поттикнат, да ги почувствуваат своите грешки и да ги променат своите навики.“
(Свети Пајсиј Светогорец)
„Невозможно е човек кој го уредува својот живот според советите и расудувањето на духовните отци да падне во духовна измама. Дури и ако духовникот нема дар на расудување, самото откривање на лошите помисли пред него истите ги ослабува и ги суши.“
(Свети Касијан Римјанин)
„Ако некој, потпирајќи се само на својот разум, мисли дека нема потреба од духовен водач, брзо ќе отстапи од вистинскиот пат.“
(Преподобен Антониј Оптински)
„Како што лекарите во медицината не постапуваат сите на ист начин, така и лекарите на духот – духовните отци – не делуваат еднакво. Некои му дозволуваат на болниот речиси сè, а други му наложуваат строга дисциплина. Но целта на сите е една – исцеление.“
(Преподобен Антониј Оптински)
„Зошто е неопходен духовниот отец? За безбедно да го поминеш патот и да стигнеш до Царството Небесно, а да не се изгубиш по патот. Затоа е неопходно да ги следиш советите и упатствата што ти ги дава духовниот отец. Не е доволно само често да го посетуваш, туку треба и да ги исполнуваш неговите совети. Бог благоволи кога луѓето се водени од други луѓе. Совршениот мир и олеснување доаѓаат преку целосна доверба и послушност кон духовниот отец.“
(Преподобен Никон Оптински)
„Апостол Павле беше повикан од самиот Христос. Зар Господ, Кој лично му се јави, не можеше да му покаже како да се усовршува во верата? Можеше, но Господ го испрати кај Ананија, оставајќи пример дека сите имаат потреба од духовно раководство и покорност кон духовен отец.“
(Авва Мојсеј)
