Филмскиот режисер Мел Гибсон ќе започне со снимање на долгоочекуваното продолжение на филмот Страдањата Христови, насловено како Воскресение Христово, во август оваа година во Италија.
Информацијата ја потврди директорката на римските студија Cinecittà Studios, Мануела Качамани, во изјава за италијанскиот весник Il Sole 24 Ore. Таа посочи дека филмот целосно ќе се снима во студијата „Чинечита“, при што ќе бидат изградени голем број сценографии и филмски сетови.
Во интервју за подкастот на Џо Роган, Гибсон откри дека проектот е „исклучително амбициозен“ и дека приказната ќе опфати широк временски и духовен опсег – „од падот на ангелите до смртта на последниот апостол“.
„За да се раскаже приказната правилно, мора да се започне од падот на ангелите. Тоа значи дека се навлегува во друг свет, друга реалност. Потребно е да се прикаже и пеколот, Шеол“, изјави Гибсон.
Тој додаде дека предизвикот е да се најде пристап кој нема да биде банален или предвидлив, туку ќе предизвика силни емоции кај публиката преку визуелниот израз и режијата.
Гибсон потврди дека планира повторно да го ангажира Џим Кавазиел во улогата на Исус Христос. Сепак, поради тоа што поминале повеќе од 20 години од првиот филм, ќе се користат современи техники, вклучително и дигитално „подмладување“ (CGI).
Оригиналниот филм „Страдањата Христови“, објавен во 2004 година, и покрај контроверзиите, оствари огромен комерцијален успех со заработка од околу 370 милиони долари само во САД. Многумина го сметаат за филм кој го отвори патот за религиозни продукции во Холивуд.
Извор: https://www.ewtnnews.com
