Виена, 16 април 2025 – Во новата учебна 2024/25 година, исламот за првпат ја надмина христијанската вероисповед и стана најзастапена религија меѓу учениците во задолжителните училишта во австриската престолнина.
Според податоците на виенските образовни власти, од околу 112.600 ученици во основните, средните, специјалните и стручно-насочените училишта, 41,2 отсто припаѓаат на исламската вероисповед. Со ова се бележи раст во однос на минатата година, кога процентот изнесувал 39,4 %.
Христијанските деноминации сега сочинуваат 34,5 % од учениците: 17,5 % се римокатолици, 14,5 % православни, а 1,7 % евангелисти. Значаен дел, речиси 23 %, не се изјасниле за припадност кон никаква вера.
Нов предмет „Живот во демократија“
Градската советничка за образование Бетина Емерлинг (Neos) најави воведување на нов задолжителен предмет „Live in a Democracy“ (Живот во демократија), кој треба да ја зајакне свеста кај младите за човековото достоинство, демократските и етичките вредности. Причина за оваа иницијатива е порастот на случаи на дискриминација, антисемитизам, нетолеранција кон ЛГБТИК+ заедницата и отпор кон родова еднаквост, кои најчесто се забележуваат кај дел од младите муслимани.
Политички и општествени реакции
Новата статистика предизвика бурни реакции во австриската јавност. Опозициската партија FPÖ оцени дека Австријците стануваат „странци во сопствената земја“, додека родителските организации предупредуваат на се поголеми образовни предизвици во мултикултурните училници.
Експертите сметаат дека демографските промени во Виена се резултат на долгогодишната миграција и падот на традиционалната католичка припадност.
Извор: The Local Austria
