Кoja е историјата на чудотворната икона на Пресвета Богородица Ерусалимска – Панагија Иеросолимитиса? Каде се наоѓа денес оваа света икона, кој ја изобразил и што ѝ рекла Пресвета Богородица на монахињата која ја видела?
Според Светото Предание, чудотворната икона на Пресвета Богородица Ерусалимска потекнува од 1870 година и е поврзана со едно необично чудо.
Во тоа време, во рускиот женски манастир „Света Марија Магдалена Мироносица“, кој се наоѓа наспроти Ерусалим, во подножјето на Маслиновата Гора, живеела монахињата Татијана, која се занимавала со иконопис.
Една ноќ, додека спиела, Татијана во видение видела непозната монахиња која влегла во нејзината келија и ѝ рекла:
„Сестро Татијано, дојдов да ме насликаш.“
Татијана ѝ одговорила:
„Благослови, сестро, но јас сум иконописец, а не сликар.“
Непознатата монахиња тогаш ѝ рекла:
„Тогаш насликај ми икона.“
Изненадена од нејзината настојчивост, Татијана одговорила:
„Немам ни штица. На што да те насликам?“
Тогаш непознатата монахиња ѝ подала штица и ѝ рекла:
„Сликај!“
Додека Татијана ја изобразувала, видела како нејзините одежди стануваат златни, а лицето ѝ заблескува со силна светлина. Потоа ја слушнала како ѝ вели:
„Блажена Татијано, по апостолот и евангелист Лука, ти повторно ќе ме изобразиш.“
Во тој момент Татијана сфатила дека пред неа е самата Пресвета Богородица. Исплашена и потресена, се разбудила.
Чудесната појава на иконата
Веднаш отишла кај игуменијата и ѝ раскажала за видението. Игуменијата не ѝ поверувала и ѝ рекла да се врати да спие, а следниот ден да наслика икона на Богородица.
Но, кога Татијана се враќала кон својата келија, забележала светлина што излегувала од неа и почувствувала необично благоухание.
Веднаш ја повикала игуменијата.
Кога двете влегле во осветлената и исполнета со мирис келија, пред нив се открило необично чудо: иконата што Татијана ја видела во видението веќе се наоѓала во келијата – чудесно создадена, без човечка рака.
По ова, Пресвета Богородица повторно ѝ се јавила на монахињата Татијана и ѝ рекла:
„Однеси ме долу, во мојот дом, во Гетсиманија.“
Така и било направено.
Каде се наоѓа иконата денес?
Оттогаш чудотворната икона на Пресвета Богородица Ерусалимска се чува во светињата на Гробот на Пресвета Богородица во Гетсиманија, во Ерусалим.
Преданието за иконата сведочи за особена почит кон неа, а низ годините со неа се поврзуваат и бројни сведоштва за исцеленија и чудесна помош.
Тропар на Пресвета Богородица Ерусалимска
„Побрзај да им помогнеш на оние што прибегнуваат кон Тебе, Владичице, кои благоговејно се поклонуваат на Твојот неракотворен лик при сечесниот Гетсимански гроб, од кој изобилно се излеваат потоци на исцеленија и струи на милосрдие за оние што Те воспеваат, Преславна Дево Ерусалимска.“
Величанија
Да пристапиме и со побожност да го целиваме ликот на Секогашдева, создаден во Ерусалим без човечка рака и наречен со сечесното име Ерусалимска.
Радувај се, Патеводителке на младите кон спасението, Заштитничке и Помошничке на оние што прибегнуваат кон Тебе во сите животни бури, украсу на Гетсиманија, сечесна Владичице.
Со вера му се поклонуваме на Твојот чесен лик, кој Татијана го виде во својата келија озарен со светлина, Владичице Богородице, како на неракотворен образ.
Поклонувајќи се со голема побожност на Твојата чудотворна икона во Ерусалим, Мајко Божја, изобилно ја примаме благодатта што од неа се излева врз сите.
Да пристапиме и побожно да ја целиваме Твојата чесна икона при Гетсиманскиот гроб, која го носи светлото име Ерусалимска, Дево Богородице.
Парализиран човек чудесно си исправила во Бугарија и си ги отворила очите на слепа жена, кога таа го целивала Твојот неракотворен образ, Дево.
