Со голема свеченост, на Неделата на Светите Праотци (14 декември 2025 година), во Патријаршиската катедрала во Фанар беше извршено архијерејското ракополагање на митрополитот-избран Григориј, новиот Митрополит на Анкара.
Со Божествената Литургија началствуваше Вселенскиот патријарх г.г. Вартоломеј, во сослужение на архијереи од Вселенскиот престол и од сестринските Цркви, меѓу кои митрополитите Дамаскин од Дидимотихо, Антим од Александруполис, Кирил од Имврос и Тенедос, Симеон од Фтиотида, Андреј од Сарандa Еклисии и Амфилохиј од Тера, Аморгос и Островите, како и други архијереи.
Во своето слово пред чинот на ракополагањето, Вселенскиот патријарх топло зборуваше за карактерот и долгогодишната служба на митрополитот Григориј во Фанар, истакнувајќи дека тој верно служел на различни одговорни должности во Патријаршискиот двор, а на крајот и како Голем протосингел. Патријархот ја изрази својата увереност дека новиот архијереј ќе го отелотвори „духот на Фанар“, останувајќи верен на стекнатото црковно предание, а воедно покажувајќи пастирска чувствителност кон потребите на современото време и грижа за човечката личност.
Користејќи ја сликата на штафетна трка, Патријархот Вартоломеј нагласи дека животот на Црквата бара континуитет, солидарност и координација, подвлекувајќи дека секоја генерација и секој служител на Црквата е повикан не само да го чува она што му е предадено, туку да ја истрча „својата етапа“ со будност и динамично присуство, зашто – како што истакна тој – „никoј не победува сам“.
Осврнувајќи се на историската црковна област Анкара, Патријархот му упати татковски совети на митрополитот Григориј на почетокот од неговата архипастирска служба. Тој напомена дека, покрај православните дипломати и вработени, во главниот град на Турција живеат и работат повеќе од десет илјади православни христијани од различни национални средини. Патријархот го охрабри новиот архијереј да го чува наследството на соживот, слобода на совеста и отвореност – етос неспоив со секоја форма на фундаментализам.
Вселенскиот патријарх посебно ги истакна и двете суштински димензии на епископскиот идентитет и мисија: Светата Евхаристија и служењето (ѓаконијата). Тој го потсети новоракоположениот митрополит дека срцето на неговото служење мора да остане евхаристиското собрание и го повика целиот свој живот да го живее како слуга, олицетворувајќи ја жртвената љубов преку лична и конкретна грижа за ближниот.
Патријархот Вартоломеј се осврна и на богословската ангажираност на митрополитот Григориј, особено на неговата работа околу прашањето за украинската автокефалност, охрабрувајќи го и понатаму да црпи инспирација од богословието за својата литургиска, проповедничка и пастирска служба, како и за сведоштвото на Црквата во светот.
На богослужбата присуствуваа бројни архијереи, свештенство и Архонти на Големата Христова Црква, како и дипломатски претставници и многуброен народ. Веднаш по завршувањето на службата, во Салата на Престолот во Патријаршискиот дом, митрополитот Григориј го изговори својот одговор, изразувајќи благодарност до Вселенскиот патријарх и Светиот и Свештен Синод за неговиот избор. Тој со емоции говореше за годините на својата служба во Фанар и за својата намера целосно да му се посвети на стадото на Анкара, од кое многумина допатувале од главниот град за да присуствуваат на неговото ракополагање.
Извор: orthodoxtimes.com
