За време на својата поклоничка посета на Скитот на Светиот Пророк Илија на Света Гора, Блаженејшиот Митрополит на Киев и на цела Украина, г. Епифаниј, одржа беседа исполнета со длабока духовна порака и силни библиски алузии, поврзувајќи ја современата руска агресија со примерот на царот Ахав и Пророкот Илија — симбол на непоколебливата вера и ревноста за Божјата вистина.
„Силните од овој свет се кренаа против нашиот народ, против нашата татковина — Украина, и против нашата света Автокефална Православна Црква,“ рече митрополитот, нагласувајќи дека тие дејствуваат во духот на „новите цареви Ахавови“, кои, како и некогашниот злочестив цар, се обидуваат да го уништат она што му припаѓа на Бога.
„Овие нови следбеници на безбожниот Ахав сакаат да нè уништат, токму како што тој се обиде да го уништи Пророкот Илија,“ продолжи митрополитот. „Но, ние се потсетуваме на неговиот пример — на неговата ревност, на неговата молитва и на неговата непоколеблива вера во Божјата правда. Зашто, како свети Илија, знаеме дека вистината е на наша страна.“
Митрополитот остро го осуди однесувањето на религиозното и политичкото раководство на Русија, кое, според неговите зборови, „отворено го презира канонскиот поредок на Православната Црква и се обидува да го наруши нејзиното единство“.
„Цар Ахав го презираше Ерусалим и храмот Божји,“ рече Епифаниј. „И денес, новите Ахавови од северот го презираат црковниот поредок што го востановиле Светите Отци и Вселенските Собори. Тие го отфрлаат приматот на служба на Вселенскиот Патријарх и одбиваат да останат во единство со својата Мајка – Големата Христова Црква во Константинопол.“
Со благодарност и љубов, тој се обрати и кон Вселенскиот Патријарх Вартоломеј, велејќи:
„Воздигнуваме искрени молитви за Големата Христова Црква во Константинопол – нашата Мајка – и за нејзиниот достоен Првопрестолник, Неговата Сесветост Вселенскиот Патријарх Вартоломеј, по чиј благослов дојдовме на Светата Гора.“
Во продолжение, Митрополитот Епифаниј ги повика верниците и монасите да останат цврсти во верата и да го продолжат духовниот отпор против злото, по примерот на Пророкот Илија:
„Нашата Црква му служи на Бога и на побожниот народ на Украина без страв. Сведочиме за вистината, остануваме верни на канонскиот поредок и го бараме единствено она што ја зајакнува вистинската православна вера.“
Во заклучокот на својата беседа, тој упати молитвен повик за мир:
„Да се молиме за крај на војната и на сите страдања што ги предизвикува. Да се надеваме дека, преку напорите на сите луѓе со добра волја, ќе настапи благословениот мир Божји и ќе завладее над земјата.“
Извор: OrthodoxTimes.com
