Меѓународниот теолошки симпозиум „Спомен и чест на старецот Емилијан Симонопетриски: сведок на славата Божја и духовен водител“ доби своја официјална веб-страница на грчки и англиски јазик.
На грчки: https://geronaimilianos.org/
На англиски: https://geronaimilianos.org/en/
Симпозиумот го организираат Светата Велика Манастирска обител Ватопед и Светиот манастир Симонопетра на Света Гора.
Кога и каде ќе се одржи
Меѓународниот теолошки симпозиум ќе се одржи во Атина од 8 до 10 мај 2026 година.
Свеченото отворање ќе се одржи на 8 мај во 17:00 часот во Christmas Theater (Олимпискиот објект Галатси).
Работните сесии на симпозиумот на 9 и 10 мај ќе се одржат во Wyndham Grand Hotel (ул. „Мегалу Александру“ 2, плоштад Караискаки).
За личноста на старецот Емилијан
Старецот Емилијан Симонопетриски се смета за една од најзначајните духовни личности на современото православие. Тој го посветил својот живот на подвиг, молитва и духовно раководство на своите духовни чеда.
Неговите зборови, исполнети со прослава на Светата Троица и надеж за секоја душа, биле извор на духовна инспирација за многу луѓе – монаси и мирјани.
Целта на симпозиумот е да се истражи и претстави неговата личност, духовно, пастирско и богословско дело, како и духовното наследство што го оставил и неговото значење за современиот свет.
Учесници
На симпозиумот ќе учествуваат повеќе архиереи, игумени, свештеници, монаси и универзитетски професори, меѓу кои:
митрополитите Мелитон Филаделфиски, Атанасиј Лимасолски, Николај Месогајски и Лавреотиски, Максим (Западна Америка – Српска православна црква), Јустин Новокрински и Каламариски, епископ Александар Голицин од Орегон,игумените Алексиј (манастир Ксенофонт), Тихон (манастир Ставроникита), Агатиј (скит Благовештение – Романија), игуменките Евфимија (манастир Пантократор – Крф) и Порфирија (манастир на св. Симеон Столпник – Либан),
како и бројни теолози, свештеници и научници од различни православни земји.
Организација на симпозиумот
Научниот комитет на симпозиумот го сочинуваат познати богослови и професори од Солунскиот и Атинскиот универзитет, додека организацискиот комитет го сочинуваат монаси од манастирите Симонопетра и Ватопед, како и соработници од институтот „Св. Максим Грек“.
Слободен влез
Влезот на симпозиумот е слободен за сите посетители.
Контакт за информации:
symposio@geronaimilianos.org
Клеантис Низамис: +30 699 891 5231
Никос Гурарос: +30 694 493 0741
Симпозиумот има за цел да придонесе кон подлабоко разбирање на духовното наследство на старецот Емилијан и неговото влијание врз православната духовност, монаштвото и богословската мисла во современиот свет.
Извор: orthodoxianewsagency.gr
