Со особена духовна возвишеност и во присуство на илјадници верници од цела Грција и Балканот, на 9 ноември 2025 година, на островот Егина се одржа традиционалната литија во чест на Свети Нектариј Егински – чудотворецот и заштитник на островот.
Свеченоста започна во утринските часови по завршувањето на Божествената литургија во Манастирот „Света Троица“, каде почиваат моштите на светецот. Верниците, заедно со архиереите, свештенството, монаштвото, претставници на државните власти и локалното население, ја пренесоа чесната глава (Τιμία Κάρα) и иконата на Свети Нектариј низ централните улици на островот до катедралниот храм.
Во литијата учествуваа и духовни делегации од повеќе православни земји, музички оркестри и ученици од локалните училишта, додека целата Егина беше украсена со знаменца и цвеќиња. Настанот заврши со молитва и благослов за здравје и мир на сите присутни, а моштите на светецот беа повторно положени во манастирот.
Прославата потсети дека Свети Нектариј останува симбол на вера, надеж и исцеление за илјадници луѓе ширум светот, кои секоја година доаѓаат на островот за да му се поклонат.
