Патријархот на Православната црква на Србија, г.г. Порфириј, испрати писмо до повеќе светски лидери со повик да го искористат своето влијание за да се запре спроведувањето на, како што го опиша, „крајно дискриминаторскиот закон за странци“ воведен од властите во Приштина.
Писмото е упатено до папата Лав XIV, претседателот на Руската Федерација Владимир Путин, претседателот на Соединетите Американски Држави Доналд Трамп и претседателот на Франција Емануел Макрон. Исто така, писмото било испратено и до повеќе европски лидери, меѓу кои и премиерката на Италија Џорџа Мелони, премиерот на Обединетото Кралство Кир Стармер и германскиот канцелар Фридрих Мерц. Пораката била испратена и до генералниот секретар на Обединетите нации Антонио Гутереш, како и до генералниот директор на УНЕСКО, Калед Ел Енани.
Во своето писмо, патријархот Порфириј предупредува дека спроведувањето на законот може да има сериозни последици за српската заедница во Косово и Метохија. Според него, законот може да го доведе во прашање функционирањето на Универзитетот во Косовска Митровица, како и на основните и средните училишта што ги посетуваат српските ученици кои следат образовни програми на својата држава.
Покрај тоа, патријархот истакнува дека може да биде загрозен и целиот здравствен систем што обезбедува медицинска грижа за Србите во регионот. Тој предупредува дека, доколку законот се спроведе, Србите би можеле да останат без пристап до образование и здравствена заштита, додека многу вработени во образовниот и здравствениот сектор би можеле да ги изгубат своите работни места.
Според патријархот Порфириј, ваквиот развој на настаните може да доведе до уште поголемо иселување на православните Срби од, како што ја опиша, древната христијанска земја.
Тој потсети и дека во Косово и Метохија се наоѓаат околу 1.300 православни цркви, манастири и други христијански свети места, од кои многу биле уништени во минатото. Патријархот нагласи дека на ниту едно друго место во Европа нема толку голема концентрација на христијанско наследство на едно подрачје, вклучително и четири локалитети кои се наоѓаат на листата на светско наследство на УНЕСКО во опасност.
Во исто време, патријархот подвлече дека Православната црква на Србија останува посветена на барањето мирно решение. Тој изрази надеж дека српските власти ќе направат сè што е можно за да се најде компромис.
„Човечките животи се најголемата света вредност и ние сме должни да ги заштитиме“, заклучи духовниот водач на православните Срби.
Извор: Православната црква на Србија
