Православна црква на Македонија – Охридска архиепископија планира изградба на фотоволтаичен парк со инсталирана моќност од 20 мегавати во охридскиот регион, како дел од поширокиот инвестициски бран во енергетиката во земјава.
Проектот ќе се реализира преку компанијата „Тринити Солар ДОО“, која е во сопственост на МПЦ-ОА, а соларните панели се планира да бидат поставени во атарот на селото Долно Лакочереј, во близина на Охрид.
Оваа инвестиција е дел од годишниот план за изградба на енергетски објекти за 2026 година, кој го усвои Владата по предлог на Министерството за енергетика. Во рамки на планот, од вкупно 284 иницијативи, прифатени се 67 проекти со капацитет над 1 мегават, со вкупна инсталирана моќност од 4.416 мегавати и проценета вредност од околу 3,74 милијарди евра.
Според анализата на неделникот „Фокус“, интересот за инвестиции во енергетиката е значително зголемен, при што меѓу инвеститорите се појавуваат политички поврзани бизнисмени, поранешни функционери, како и верски институции.
МПЦ веќе има искуство со енергетски проекти. Пред околу една и пол година, црквата се вклучи во проект за изградба на мала хидроцентрала на реката Треска, во партнерство со други субјекти.
Во однос на актуелниот соларен проект, покојниот митрополит Тимотеј уште во 2022 година изјави дека ваквите инвестиции не се невообичаени и зависат од финансиските можности на црквата.
„Не е забрането, ниту е чудно тоа што МПЦ-ОА сака да инвестира. Сè зависи од средствата што ќе можеме да ги обезбедиме“, изјави тогаш митрополитот.
Покрај овој проект, во планот за 2026 година е предвидена и изградба на когенеративна гасна централа со моќност од 495 мегавати, вредна над 445 милиони евра, зад која стои компанија поврзана со унгарски бизнис круг близок до премиерот Виктор Орбан.
Извор: focus.mk
