Денес се навршува една година од денот кога Светиот синод на Православната автокефална Црква на Албанија го избра митрополитот Корчански г. Јован (Пелуши) за Архиепископ на Тирана, Драч и на цела Албанија, наследувајќи го блаженоупокоениот архиепископ Анастасиј, обновителот на Православието во соседната земја.
Во текот на првата година од своето архиепископско служење, архиепископот Јован, воден од духовното наследство на архиепископот Анастасиј и со дух на смирение, продолжува со духовната мисија во земјата која половина век беше изложена на атеистички прогон.
Посветен на богослужбениот и социјалниот труд на Црквата, покажувајќи почит кон канонскиот поредок – што се виде и при неговата мирна посета на Вселенската патријаршија минатиот јуни – во време кога меѓуправославните односи се соочуваат со предизвици, архиепископот Јован останува отворен за меѓухристијански и меѓурелигиски дијалог и, пред сѐ, посветен на служењето на човекот како личност, без оглед на неговото потекло или вера.
Често потсетувајќи се на величината на својот претходник, за кого вели дека „не обнови само цркви и згради, туку пред сѐ ги обнови душите на луѓето“, архиепископот Јован истакна и во едно од своите први интервјуа по изборот:
„Несомнено, светлото наследство на архиепископот Анастасиј е истовремено голем благослов и голема одговорност. Неговата извонредна личност, со силен глас и присуство во Православната Црква и пошироко, остави неизбришлив белег.“
Вера вкоренета во времињата на прогон
Архиепископот Јован, кој веќе ја навршува 70-тата година од животот, има животен пат кој сведочи за вера што ги надминувала стравот и предизвиците.
Роден како Фатмир (Ефтихиј) Пелуши на 1 јануари 1956 година во Тирана, во младоста (1979) – во период на жестоки религиски прогони – бил тајно крстен од храбриот свештеник о. Косма Кирио, подоцнежен епископ Аполонски, и се приклучил на малата тајна заедница на тогашната подземна Црква.
Студирал психологија на Универзитетот во Тирана, а од 1979 до 1990 година работел во одделот за рехабилитација преку работна терапија во Психијатриската болница во Тирана.
Неговиот татко уште во 1944 година бил прогласен за непријател на режимот, кој ги прогонувал сите верски заедници, а и самиот Јован повеќепати се соочувал со опасност од апсење.
Од емиграција до враќање и служба
Во 1990 година побегнал во Италија, а потоа во Бостон, САД, каде со стипендија од албанската заедница студирал теологија на Грчко-православната богословска школа „Чесниот Крст“, стекнувајќи во 1993 година магистерска диплома (MTS) со највисоки оценки.
Во 1992 година, во време кога многу Албанци ја напуштале земјата, решил да се врати за да придонесе во обновата на Црквата во Албанија. Архиепископот Анастасиј ја поздравил таа одлука и во септември истата година го назначил за професор на Богословската академија на Православната автокефална Црква на Албанија.
Свештеничка служба и 27 години пастирство во Корча
На 27 февруари 1994 година бил ракоположен за ѓакон, а на 4 декември истата година за свештеник. Во 1995 година, по поттик на архиепископот Анастасиј, повторно заминал во Бостон за понатамошни богословски студии. Поради високите резултати неговото име било внесено во Националниот список на деканот (National Dean’s List), меѓу најдобрите студенти на универзитетите во САД.
Во 1996 година го добил чинот архимандрит, а во 1997 година магистерска диплома по теологија. Од 1996 до 1998 година бил декан на Богословската академија, а во 1998 година бил ракоположен за епископ и избран за митрополит на Корча, продолжувајќи истовремено и со наставната дејност.
Во Корча придонел за општествениот, образовниот и културниот напредок на градот, негувајќи дух на мирен соживот меѓу верските заедници. Често одржува предавања на Универзитетот во Корча и во други образовни институции, истакнувајќи ја важноста на љубовта кон татковината и активниот придонес на младите за развојот на современото албанско општество.
По негова иницијатива, веќе 27 години функционира и дневна народна кујна за сиромашните жители на градот.
Признание за неговата служба
Неговата долгогодишна служба е призната и од локалните власти. Во 2003 година бил прогласен за почесен граѓанин на регионот Корча, а во 2008 година и за почесен граѓанин на градот Корча за придонесот во развојот на верската толеранција и хуманитарната дејност.
Во 2018 година, Универзитетот „Фан С. Ноли“ во Корча му ја додели титулата Doctor Honoris Causa, признавајќи го како истакната личност на духовниот и културниот живот.
Активен во меѓуправославниот и меѓурелигискиот дијалог
Архиепископот Јован ја претставувал Православната автокефална Црква на Албанија на бројни меѓуправославни средби и учествувал во подготовката на документите на Светиот и Голем Собор на Крит (2016).
Тој бил член и на работни групи на Светскиот совет на цркви, како и на заедничката работна група за соработка меѓу Светскиот совет на цркви и Римокатоличката црква. Долги години учествува и во официјалните богословски дијалози меѓу Православната и Римокатоличката црква, како и со древните источно-православни цркви.
На 16 март 2025 година митрополитот Корчански Јован беше едногласно избран за Архиепископ на Тирана, Драч и на цела Албанија, наследувајќи го блаженоупокоениот архиепископ Анастасиј.
При неодамнешната посета на САД, на меѓународната конференција во Бостон посветена на една година од упокојувањето на архиепископот Анастасиј, архиепископот Јован истакна:
„Целиот негов живот беше служење – непрестајна служба кон Христос и кон секој човек што го сретнал.“
Извор: orthodoxianewsagency.gr
