Свештенството и народот на Имврос приредија срдечен пречек за Вселенскиот патријарх г.г. Вартоломеј, кој во вторникот вечерта, на 11 август 2026 година**, пристигна во своето родно место, придружуван од Папата и Патријарх Александриски г.г. Теодор и Архиепископот Тирански и на цела Албанија г.г. Јован.
Тројцата поглавари пристигнаа на Имврос во пресрет на сослужувањето што ќе се одржи во четврток, 13 август 2026 година, кога ќе биде одбележана 65-годишнината од стапувањето на Вселенскиот патријарх во редовите на свештенството, по неговото дипломирање на Богословската школа на Халки во 1961 година.
На пристаништето на островот тројцата поглавари беа срдечно пречекани од свештенството и народот на Имврос, предводени од Митрополитот на Имврос и Тенедос г. Кирил, како и од игуменот на светогорскиот манастир Есфигмен, архимандритот Вартоломеј.
Вселенскиот патријарх, Александрискиот патријарх и Архиепископот Албански се придружувани од старец-митрополитот Халкидонски г. Емануил, во име на јерархијата на Вселенскиот престол, Митрополитот Филаделфиски г. Мелитон, кој исто така потекнува од Имврос, како и од свештенослужители на Патријаршискиот двор.
Веднаш по пристигнувањето, поглаварите се упатија во Митрополитскиот храм на Пресвета Богородица, каде што се поклонија.
Во одбележувањето на оваа значајна годишнина ќе учествуваат и Митрополитот Мирски г. Хризостом и архонт-егзархот на Великата Христова Црква г. Атанасиос Мартинос, претставувајќи ги носителите на почесни достоинства при Вселенската патријаршија, придружуван од својата сопруга, г-ѓа Марина Мартину.
Во сабота, 15 август 2026 година, на празникот Успение на Пресвета Богородица, ќе биде отслужено сослужување на Неговата Сесветост Вселенскиот патријарх г.г. Вартоломеј и Неговото Блаженство Архиепископот Албански г.г. Јован, во празничниот свет храм „Благовештение на Пресвета Богородица“ во Агридија на Имврос.
Извор: orthodoxianewsagency.gr
