Вселенскиот патријарх Вартоломеј изјави дека „постои морална обврска иднината на еден народ да не биде предмет на тајни преговори или да се одлучува без негово целосно и рамноправно учество. Сѐ што е помалку од тоа не е мир, туку неправда што добила дипломатско име“.
Неговата Сесветост, Вселенскиот патријарх Вартоломеј, по повод наоѓањето на чесната глава на светиот пророк, Претеча и Крстител Јован, на 24 февруари 2026 година, отслужи Божествена литургија на Преждеосветените дарови, по што изврши Трисагија за покој на душите на жртвите од војната во Украина, по повод навршувањето четири години од руската инвазија врз земјата.
На богослужбата присуствуваа почесниот конзул на Грција во Градот, г. Теофилос Георгакис, како претставник на Генералниот конзул, генералниот конзул на Украина, г. Роман Недилски, со своите соработници, како и генералните конзули на Австрија, Аргентина, Белгија, Молдавија и Холандија, заедно со претставници на конзулатите на Обединетото Кралство, Канада, Сојузна Република Германија, Полска, Словачка, Франција и Шведска.
Во Патријаршискиот храм присуствуваа и повеќе од двесте жени – мајки, сестри, сопруги и ќерки на загинати, заробени и исчезнати украински војници, кои допатуваа од Украина за заедничка молитва, држејќи во рацете фотографии од своите најблиски.
Во своето обраќање на англиски јазик, Патријархот се осврна на четиригодишнината од рускиот напад врз суверената држава Украина, кој, како што истакна, ги разурнал животите на безброј семејства.
„Секоја жртва не е статистика. Таа е свештен живот, кој го носи единствениот печат Божји“, нагласи тој, повикувајќи да не дозволиме суровата рамнодушност да завладее со нашите срца.
Вселенскиот патријарх истакна дека украинскиот народ покажал особена издржливост, зачувувајќи ја својата вера, јазик и културно наследство, и покрај притисоците да исчезне во сенката на поголеми империи. „Обидите да се задуши духот на еден народ можат да нанесат длабоки рани, но не можат да го уништат животот во него. Копнежот по слобода и способноста да се живее според сопствената совест се богоустановени реалности што не можат да бидат изгаснати со сила“, рече Патријархот, повторувајќи ја постојаната грижа на Мајката Црква – Константинопол – за Украина.
„Денес се молиме за оние што ги загубија своите животи – не како колатерална штета во стратегија на моќ, туку како сакани личности, чие отсуство остава празнина што ниту едно геополитичко решение не може да ја исполни“, подвлече Неговата Сесветост. Тој додаде дека молитвата е и за сите што страдаат, за разделените семејства, за оние што се во заробеништво, како и за оние што ја бранат својата татковина „не од желба за судир, туку од длабока љубов кон своите ближни и кон иднината што сѐ уште не е напишана“.
Патријархот истакна дека стремежот не треба да биде само прекин на непријателствата, туку вистински, праведен и траен мир.
„Бојно поле без истрели не е секогаш мир. Тоа може да биде немирна тишина, замор помешан со спокојство или покорност прикриена како смирение. Вистинската хармонија бара обновување на нарушеното и признавање на правото на еден народ сам да ја определува својата судбина. Морална обврска е иднината на еден народ да не биде предмет на тајни преговори или да се одлучува без негово целосно и рамноправно учество. Сѐ што е помалку од тоа не е мир, туку неправда што добила дипломатско име.“
„Црквата нема да ве напушти“, ги увери тој украинските верници, нагласувајќи дека ќе остане покрај нив сѐ додека не завладее мирот.
Претходно, на Патријархот му се обрати и генералниот конзул на Украина, кој истакна дека руската агресија донела на украинската земја злосторства што светот нема право да ги заборави: разрушени домови, убиени и мачени цивили, киднапирани деца и уништени храмови. Тој посочи дека мачењето и злоупотребата на украинските воени заробеници се злосторства што ја потресуваат совеста на човештвото.
„Ова е неиспровоцирана и насилна војна“, нагласи тој, потсетувајќи дека Патријархот ја опиша како „ѓаволска“. „Тоа е грев пред Бога и злосторство против човештвото. Затоа духовната поддршка што ја чувствуваме тука, во срцето на Православието, е толку драгоцена.“
Генералниот конзул изрази благодарност за доследната и храбра поддршка на Вселенскиот патријарх за борбата на Украина за слобода, истакнувајќи дека неговиот глас е глас на христијанска љубов и солидарност, и светлина на надеж за украинскиот народ.
Извор: https://www.orthodoxianewsagency.gr
