Последниот дел од централната кула на барселонската базилика Саграда Фамилија е поставен на своето место, со што храмот ја достигна својата конечна височина – 172,5 метри – точно 144 години по почетокот на изградбата.
По неколку дена одложување поради силен ветер, во петокот во 11 часот претпладне беше подигнат и монтиран горниот дел од 17-метарскиот, четиристранен крст од челик и стакло, со што беше довршена кулата посветена на Исус Христос. Со ова, Саграда Фамилија станува највисоката градба во Барселона и највисоката црква во светот.
Главниот архитект на проектот, Жорди Фаули, изјави дека станува збор за „радосен ден, прекрасен за сите што го направија ова возможно“, додека беа подигнати каталонското и ватиканското знаме.
Свеченост по повод завршувањето на кулата – највисоката од вкупно 18-те што ги замислил Антони Гауди – ќе се одржи на 10 јуни, на стогодишнината од неговата смрт во 1926 година. Храмот беше осветен во 2010 година од папата Бенедикт XVI.
Уште една деценија до целосно завршување
Иако централната кула е довршена, изградбата на базиликата се очекува да продолжи уште околу една деценија, особено со реализацијата на впечатливата јужна фасада.
За градот што со генерации живее со недовршеното дело на Гауди, денот беше исполнет со емоции. Денес, и покрај тоа што има уште работа, храмот го дефинира хоризонтот на Барселона исто толку силно колку што Ајфеловата кула го обележува Париз или Емпајер стејт билдинг – Њујорк.
Со децении, Саграда Фамилија беше отворено градилиште под ведро небо, каде што генерации каменоресци и столари работеа паралелно со туристите, кои во голема мера ја финансираа изградбата. Во последните 15 години, со оформувањето на внатрешноста, просторот почна повеќе да наликува на храм отколку на градилиште.
Геометриските решенија на Гауди создадоа внатрешност исполнета со светлина: столбови што наликуваат на стебла и се разгрануваат кон таванот, бел камен обоен со нијанси од витражите – архитектонска визија што ги спојува математиката, симболиката и духовноста.
Контроверзии и современи интервенции
Базиликата е подеднакво сакана и оспорувана меѓу жителите на Барселона. Писателот Џорџ Орвел ја нарекол „една од најгрдите згради во светот“, жалејќи што анархистите не ја урнале кога имале можност.
Сепак, токму анархистите ги уништиле оригиналните цртежи и гипсениот модел на Гауди, кои подоцна биле внимателно реконструирани. Во доцните 1970-ти, новозеландскиот архитект Марк Бери користел софтвер за дизајн на ракети за да ги реализира сложените геометриски замисли на Гауди.
На критиките дека денешниот храм не одговара целосно на првичната визија, Бери одговорил дека геометријата на Гауди е толку прецизна што секое отстапување би довело до конструктивен колапс.
И покрај тоа што делото денес е плод на многу раце, неговиот печат е препознатлив. Некои елементи предизвикуваат поделени реакции, особено Страдалната фасада, дело на скулпторот Џозеф Мариа Субирач, но целината останува несомнено „гаудиевска“.
Тројца уметници – Мигел Барчело, Кристина Иглеасиас и Хавиер Марин – се ангажирани да предложат решенија за Фасадата на славата, чија изградба се очекува да трае уште десет години.
Туристички магнет
Саграда Фамилија е најпосетуваната туристичка атракција во Барселона, со околу пет милиони посетители годишно и годишен приход од приближно 150 милиони евра, од кои околу половина досега се вложени во изградбата.
По речиси век и половина, храмот што започна како амбициозна визија на еден архитект, денес стои како симбол на трпение, вера и човечка упорност – камен, стакло и светлина издигнати кон небото.
Извор: https://www.theguardian.com
