Северна Македонија се рангира на 34. место во светот и на второ место во Европа според загаденоста на воздухот со ПМ2.5 честички, покажува најновиот глобален извештај за 2025 година објавен од платформата IQAir.
Според податоците, просечната годишна концентрација на ПМ2.5 честички во земјата изнесува околу 21,2 микрограми на кубен метар, што е три до пет пати над препорачаните вредности на Светската здравствена организација.
Во европски рамки, Македонија се наоѓа веднаш зад Босна и Херцеговина, додека зад неа следуваат Србија и други земји од регионот, што го потврдува трендот на висока загаденост на Балканот.
Извештајот се базира на податоци собрани од илјадници мерни станици ширум светот и претставува еден од најрелевантните глобални индикатори за квалитетот на воздухот.
ПМ2.5 честичките се сметаат за едни од најопасните загадувачи, бидејќи можат длабоко да навлезат во белите дробови и крвотокот, предизвикувајќи сериозни здравствени последици, вклучително и респираторни и кардиоваскуларни заболувања.
Експертите предупредуваат дека долгорочната изложеност на вакво ниво на загадување претставува значителен ризик за јавното здравје, особено за децата и повозрасните категории.
