Врз основа на официјалното известување на Министерство за внатрешни работи, од денес (1 февруари 2026 година) започна со функционирање системот „Безбеден град“, чија цел е зголемување на сообраќајната безбедност и заштита на човечките животи.
Во првата фаза, системот е активен на територијата на градовите Скопје, Куманово и Тетово, како и на Коридорите 8 и 10. Камерите поставени на критични сообраќајни точки автоматски ќе детектираат и ќе санкционираат сообраќајни прекршоци.
Системот „Безбеден град“ во оваа почетна фаза ќе регистрира четири најчести прекршоци: непрописно паркирање, пречекорување на дозволената брзина, минување на црвено светло и управување возило со истечен рок на важност на сообраќајната дозвола.
Од МВР истакнуваат дека станува збор за значајна инвестиција во јавната безбедност, која ќе придонесе за подобра регулација на сообраќајот и намалување на сообраќајните незгоди. Камерите се поставени на локации каде што најчесто се евидентираат прекршоци и каде ризикот за учесниците во сообраќајот е најголем.
Министерството апелира до сите граѓани доследно да ги почитуваат сообраќајните правила и прописи, со цел заеднички да се изградат побезбедни, посигурни и поуредени патишта низ целата држава.
Извор: Министерство за внатрешни работи
