Митрополитот Киевски и на цела Украина г. Епифаниј, поглавар на Православната црква на Украина, на 23 август 2026 година присуствуваше на Националниот молитвен појадок, кој се одржа под покровителство и со учество на украинскиот претседател Володимир Зеленски.
Митрополитот Епифаниј беше придружуван од архиереи и свештенослужители на Православната црква на Украина. Собирот го отвори со молитвата „Оче наш“, по што им се обрати на присутните.
Во своето обраќање, тој ја нагласи важноста на заедничката молитва за Украина, за украинскиот народ и за вооружените сили на земјата, кои продолжуваат да ја бранат државата од руската агресија.
Митрополитот повика на уште посилни молитви за украинските војници, нагласувајќи дека благодарение на нивната пожртвуваност Украинците можат да се собираат во главниот град и заеднички да Му благодарат на Бога.
Епифаниј се осврна и на годинашното одбележување на 975-годишнината од Киево-печерската лавра. Според него, рускиот напад врз Успенскиот соборен храм во Лаврата покажал дека за земјата-агресор „ништо не е свето“.
Поглаварот на Православната црква на Украина предупреди и на, како што рече, разорните последици од идеологијата на „Рускиот свет“ („Руски мир“) и ги повика Украинците да продолжат со заедничката борба, со надеж во Бога и барајќи ја Неговата помош.
На Националниот молитвен појадок присуствуваа претставници на цркви и верски заедници од Украина и од странство, државни функционери, припадници на вооружените сили, меѓународни партнери, воени капелани, семејства на загинати украински војници, дипломати и претставници на хуманитарни организации.
Меѓу истакнатите странски гости беа претседателот на Литванија Гитанас Науседа, премиерот на Естонија Кристен Михал, поранешниот специјален претставник на САД за Украина, генерал Кит Келог, поранешниот потпретседател на САД Мајк Пенс, американски сенатори и други официјални лица.
Извор: orthodoxtimes.com
