Хорот при Македонската православна црква „Св. Петка“ од Рокдејл ќе настапи на големиот јубилеен концерт по повод 10-годишнината од основањето на Рускиот православен машки хор на Австралија – ROMCA.
Концертот „ROMCA: Anniversary X“ ќе се одржи во недела, 6 септември 2026 година, со почеток во 17 часот, во Концертната сала на Сиднејската опера.
Покрај рускиот хор, на сцената ќе настапат и хорот при МПЦ-ОА „Св. Петка“ од Рокдејл, Антиохискиот православен машки хор и српскиот православен хор „Св. Лазар – Лазарица“, со што вечерта ќе прерасне во голема заедничка прослава на православната духовна и хорска музика.
Според официјалната програма објавена од Сиднејската опера, македонскиот хор „Св. Петка“ ќе има самостоен 15-минутен настап во првиот дел од концертот.
Првиот дел од програмата е целосно посветен на православното акапела пеење. По македонскиот хор, со по 15-минутни настапи ќе се претстават Антиохискиот православен машки хор и српскиот хор „Св. Лазар“, додека Рускиот православен машки хор на Австралија ќе има 20-минутен настап.
Во вториот дел од концертот ROMCA ќе настапи со специјално формиран јубилеен оркестар, составен од австралиски музичари. На програмата се руски народни песни, како и дела од големите композитори на православната хорска музика – Павел Чесноков, Александар Гречанинов, Сергеј Рахманинов и Александар Кастаљски.
Финалето на концертот е предвидено со изведба на прочуената увертира „1812“ од Петар Илич Чајковски.
Рускиот православен машки хор на Австралија го одбележува својот десетгодишен јубилеј под раководство на неговиот основач и диригент Нектариј Котларов. Според Сиднејската опера, ансамблот во изминатата деценија настапувал пред публика на повеќе континенти, а препознатлив е и по реткото присуство на тројца пејачи со исклучително длабоки октавистички гласови.
За значењето на поканата и можноста македонската духовна музика да биде претставена на една од најпрестижните сцени во Австралија, СБС на македонски разговараше со Александар Младеновски, потпретседател на Управниот одбор на Македонската православна црква „Св. Петка“ во Рокдејл.
Од Австралиско-сиднејската епархија на МПЦ-ОА настапот го оценуваат како значаен момент за македонската заедница во Австралија, нагласувајќи дека преку него на една од најпознатите светски сцени ќе бидат претставени македонската духовна песна, верата и традицијата.
Настапот во Сиднејската опера воедно ќе биде редок пример на едно место да се соберат хорови од повеќе православни традиции – македонската, руската, српската и антиохиската – обединети преку црковната музика.
Извор: SBS Македонски / Sydney Opera House / Австралиско-сиднејска епархија на МПЦ-ОА
