По повод Меѓународниот ден на младите, Архиепископот Австралиски г. Макариј упати порака во која нагласува дека младите не треба да се гледаат само како носители на надежта за иднината, туку и како активни учесници во сегашноста на Црквата и општеството.
„Да го слушаме гласот на младите, без да им го наметнуваме нашиот. Да ги водиме по патот на добродетелите, без да им го одземаме од Бога даруваниот дар на слободата. Да ги поддржуваме, да ги охрабруваме и да се трудиме да ги инспирираме со нашиот пример“, порачува архиепископот Макариј.
Во продолжение ја пренесуваме неговата порака во целост:
Младоста, и тоа не без причина, е окарактеризирана како најтворечкиот период од човечкиот живот на земјата. Сепак, често забораваме дека нејзиниот потенцијал не е само ветување за утрешнината, туку скапоцена вредност која може да донесе плодови уште денес.
Нашата Света Архиепископија и во практика покажа дека на младите не гледа само како на носители на надежта за иднината, туку и како на активни протагонисти во сегашноста на Црквата и нашето општество во целина.
Преку нашата пастирска грижа за младите – катихезите, училиштата, младинските собири и другите активности на нашите парохии, како и редовните Младински конференции, кои се востановени да се организираат во секоја од нашите епархии – пред сè работиме на негување на нивниот жив однос со Христос и на умножување на даровите што им се дадени од Бога.
Истовремено, ги слушаме нивните мисли, идеи, грижи и преокупации и се грижиме да го имаат просторот што им е потребен, за со храброст и вера да ги рашират своите крилја и да полетаат.
Денешниот Меѓународен ден на младите нè потсетува токму на оваа одговорност што сите ја имаме: да го слушаме гласот на младите, без желба да им го наметнуваме нашиот. Да ги водиме по патот на добродетелите, без да им го одземаме од Бога даруваниот дар на слободата. Да ги поддржуваме, да ги охрабруваме и да се трудиме да ги инспирираме со нашиот пример.
Затоа, да им ја довериме на нашите деца не само иднината, туку и сегашноста. Да стоиме покрај нив не како строги судии, туку како смирени сопатници, со трпение и љубов. Да им дадеме можности да ги развијат своите визии, да преземат одговорности и своите дарови да ги стават во служба на општото добро.
Нека Господ ги просветлува чекорите на нашите млади, нека ги благослови нивните дела и нека им даде сила да изградат подобар свет од оној што ние им го предаваме.
Извор: orthodoxianewsagency.gr
