Првите познати „змии на Богородица“ годинава повторно се појавија на грчкиот остров Кефалонија, само неколку дена пред празникот Успение на Пресвета Богородица.
Според локалниот портал KefaloniaPress, досега се забележани вкупно три змии – една во селото Маркопуло и две во Аргинија.
Една од змиите била пронајдена во храмот „Успение на Пресвета Богородица“ во Маркопуло, познат како Панагија Лагуварда, додека жителите на Аргинија уште претходниот ден забележале две змии. Веста предизвикала голема радост меѓу локалното население, а во Аргинија по нивното појавување радосно заѕвониле и црковните камбани.
Потрагата започнува по Преображение
Според локалната традиција, потрагата по таканаречените „змии на Богородица“ започнува по 6 август – празникот Преображение Господово.
Во Маркопуло и Аргинија постојат жители кои добро ги познаваат местата околу храмовите и селата каде што змиите обично се појавуваат и секоја година во овој период ги бараат.
Можно е во деновите до празникот Успение на Пресвета Богородица да бидат пронајдени уште примероци, бидејќи нивното појавување традиционално се поврзува токму со периодот пред 15 август.
Необична традиција длабоко поврзана со Кефалонија
„Змиите на Богородица“ со децении се едно од најпознатите верски и народни преданија на Кефалонија. Секоја година во август нивното појавување привлекува верници и посетители од различни делови на Грција и од странство.
Во локалната традиција нивното појавување има силна религиозна симболика и се поврзува со Богородица и со празникот на нејзиното Успение.
KefaloniaPress, сепак, забележува дека Црквата официјално не го има прогласено самото појавување на змиите за чудo.
Извор: https://www.kefaloniapress.gr/topika/koinonika/article/889657/kefalonia-emfanistikan-ta-prota-fidakia-tis-panagias-se/
