Претседателот на СДСМ Венко Филипче синоќа беше во Лешок, каде го посети Лешочкиот манастир и црквата „Свети Атанасиј“, во пресрет на празникот Успение на Пресвета Богородица – „Голема Богородица“.
Филипче и претставници на СДСМ, присуствуваа на литургијата, а по богослужбата се сретна и со митрополитот Тетовско-гостиварски Јосиф.
Во објавата по посетата, Филипче потсети дека „Голема Богородица“ секоја година го полни Лешок со верници и посетители од цела Македонија.
„Едно од карактеристичните обележја на празникот е и традиционалниот панаѓур, кој има вековна традиција“, напиша Филипче.
Тој наведува дека, според некои сознанија, панаѓурот почнал да се организира откако Кирил Пејчиновиќ добил дозвола да го возобнови Лешочкиот манастир.
Оттогаш, празникот не е само црковен настан, туку и традиција која со децении ги собира луѓето во Лешок.
Присуството на партиска делегација на СДСМ на литургијата и средбата на Филипче со митрополитот Јосиф доаѓаат во пресрет на денешното одбележување на „Голема Богородица“, кога во Лешочкиот манастир се очекува да се соберат голем број верници.
