Премиерот Христијан Мицкоски и годинава го посети манастирот „Св. Јоаким Осоговски“ во Крива Паланка, продолжувајќи ја традицијата на посети на едно од најзначајните православни светилишта во Македонија.
Денешната посета е трета година по ред откако Мицкоски, во својство на премиер, доаѓа во древниот Осоговски манастир.
„Денес го посетив манастирот ‘Св. Јоаким Осоговски’ во Крива Паланка, место со длабоки духовни и историски корени, кое со векови е дел од македонската традиција и културно наследство“, објави Мицкоски.
Во својата порака тој посочи дека светите места имаат значење што ги надминува нивните историски и архитектонски вредности.
„Нашите свети места се потсетник на вредностите што нè обединуваат – верата, достоинството, почитта кон минатото и одговорноста кон идните генерации.“
„Да го чуваме и почитуваме она што ни е оставено во наследство“, порача премиерот.
Во Осоговскиот манастир и во 2024 година
Мицкоски го посети „Св. Јоаким Осоговски“ и на 27 август 2024 година, само неколку месеци по преземањето на премиерската функција.
Посетата беше во пресрет на празниците Успение на Пресвета Богородица и споменот на Свети Јоаким Осоговски.
Тогаш премиерот го опиша манастирот како „ремек-дело на нашата култура, традиција и духовна посветеност“, истакнувајќи го неговото значење за македонското духовно и културно наследство.
Во 2025 година присуствуваше на празничната Литургија
Традицијата продолжи и следната година.
На 29 август 2025 година, на денот кога се празнува споменот на Свети Јоаким Осоговски, Мицкоски повторно дојде во манастирот кај Крива Паланка и присуствуваше на Светата архијерејска литургија.
„Денеска го посетив манастирот Свети Јоаким Осоговски, по повод празнувањето на споменот на светиот отец Јоаким Осоговски“, објави тогаш премиерот, додавајќи дека празникот започнал „во молитвена радост и духовна благодарност“.
Со денешната посета, Мицкоски трета година по ред го посетува Осоговскиот манастир во периодот на големите августовски православни празници.
Посети и на други македонски светилишта
Посетите на „Св. Јоаким Осоговски“ се дел од повеќе јавни посети на Мицкоски на православни светилишта низ Македонија во текот на неговиот премиерски мандат.
На празникот Успение на Пресвета Богородица тој го посетуваше и манастирот „Успение на Пресвета Богородица“ во Берово, каде и во 2025 година присуствуваше меѓу илјадниците верници собрани за Голема Богородица.
Мицкоски традиционално го посетува и храмот „Св. Наум Охридски“ на Попова Шапка, а во текот на мандатот повеќепати бил и во манастирскиот комплекс Пеленица кај Драчево.
Сепак, Осоговскиот манастир се издвојува по континуитетот на посетите – 2024, 2025 и 2026 година, три години по ред, во деновите кога илјадници православни верници се собираат во Крива Паланка за големите празнувања.
