Во недела, во Кишињев ќе се одржи свеченото востоличување на новоизбраниот Митрополит на Бесарабија, г. Антониј, кој неодамна беше избран од Светиот Синод на Романската Православна Црква.
Чинот на востоличувањето ќе се одржи по Божествената Литургија, која ќе започне во 8:30 часот во храмот „Свети Три Ерарси“ во главниот град на Република Молдавија.
Со Божествената Литургија ќе началствува Митрополитот Теофан на Молдавија и Буковина, во сослужение со архиереите на Светиот Синод на Митрополијата на Бесарабија, како и со други архиереи и свештенослужители на Романската Православна Црква.
На овој историски настан се очекува да присуствуваат претставници на централната и локалната власт, јавни институции, граѓански организации, како и голем број верници.
„Ги повикуваме сите свештеници, монаси, монахињи и верници да учествуваат во овој настан од длабоко духовно и историско значење, за заедно да ги вознесеме нашите молитви кон Бога и да го побараме Неговиот благослов врз служењето на новиот Првојерарх“, се наведува во соопштението на Митрополијата на Бесарабија.
Митрополитот Антониј, кој до неодамна служеше како Епископ на Балци, беше избран за Митрополит на Бесарабија од Светиот Синод на Романската Православна Црква на неговата седница одржана на 2 јули.
Извор: basilica.ro
