Во напад со беспилотно летало (дрон), вчера, во неделата на 23 август 2026 година, беше погоден Соборниот храм „Богојавление“ во центарот на Горловка. Во нападот полесно биле повредени четири лица, меѓу кои и Митрополитот Горловски и Славјански г. Митрофан.
Според соопштението на Московската патријаршија, на митрополитот Митрофан му била укажана прва медицинска помош, а неговите повреди не се причина за загриженост.
Повредени биле и архиѓаконот Роман Степин, клирик на Соборниот храм, како и двајца волонтери на Патријаршиската хуманитарна мисија – Сергеј Солонтков и Екатерина Купцова. Тие се здобиле со полесни повреди и немало потреба од хоспитализација.
Московскиот и на цела Русија патријарх г.г. Кирил, откако бил информиран за нападот и за повредувањето на митрополитот Митрофан, му упатил порака со желби за брзо закрепнување.
Во пораката патријархот Кирил наведува:
„Со длабока тага и тешко срце ја примив веста за нападот врз Соборниот храм ‘Богојавление’ во центарот на Горловка.
Непријателски дрон нападна луѓе за време на молитва, што уште еднаш го покажува отсуството на какви било принципи и очигледниот цинизам на оние што го предводеа овој злосторнички напад.
Со особена загриженост ја примив веста дека и Вие, Ваше Високопреосвештенство, сте повредени и срдечно Му се молам на Господа за Вашето исцеление. Верувам дека Спасителот, Кој нè укрепува во искушенијата, нема да Ве остави без Својата милост и ќе Ви помогне што поскоро да се вратите на архипастирската служба, која несебично ја исполнувате со непоколеблива ревност за Божјата слава, со храброст и голема љубов кон ближните.“
Извор: orthodoxianewsagency.gr
