„Вистинските чуда не предизвикуваат немир ниту поделби“, порача Митрополитот Тирски, Аморгоски и Островски г. Амфилохиј, по реакциите што во последните денови се појавија околу иконите во светиот манастир „Свети Никола“ во Имеровигли, Санторини.
Во повеќе објави и публикации на социјалните мрежи во последните денови се зборуваше за наводна чудотворна појава на иконите во манастирот.
Светата Митрополија привремено ги издвоила иконите и ги ставила под набљудување, со цел внимателно да се испита појавата и да се исклучи можноста за човечка интервенција.
Митрополитот Амфилохиј одговори и на критиките што ги предизвика ваквата одлука, нагласувајќи дека проверката на случајот во никој случај не претставува недостаток на вера.
„Вистинските чуда се плод на Светиот Дух. Тие донесуваат длабок мир, скрушеност и смирение во душата. Не создаваат немир, не разделуваат и воопшто немаат потреба од човечка реклама, застапници или врева на социјалните мрежи“, порача Митрополитот.
„Со внимание и болка го читам она што се пишува“, додаде тој, истакнувајќи дека ги прифаќа критиките, навредите и личните напади што ги добива во последните денови, а верниците ги повика на молчание и молитва, без расправии и осудување.
Истовремено, Митрополитот ги демантираше и шпекулациите дека манастирот ја прекинал својата работа.
Светиот манастир „Свети Никола“ во Имеровигли останува отворен, а неговата богослужбена програма продолжува непречено и според вообичаениот распоред.
Извор: orthodoxia.info
