Во древниот манастир Панагија Сумела, на планината Мела крај Трабзон, во неделата, 23 август 2026 година, беше отслужена Света Литургија по повод Деветте дена по Успението на Пресвета Богородица.
Богослужбата се одржа под значителни ограничувања, откако турските власти дозволија присуство на само 80 претходно одобрени лица, додека на претставниците на медиумите не им беше овозможено да присуствуваат во манастирот.
Со благослов на Вселенскиот патријарх г.г. Вартоломеј, со Светата Литургија началствуваше Митрополитот Неаполски и Ставрополски г. Варнава, со сослужение на уште двајца архијереи.
До пладневните часови манастирскиот комплекс останал затворен и за туристи и други посетители, а по завршувањето на богослужбата повторно бил овозможен слободен пристап.
Оваа година Литургијата не беше отслужена на самиот празник Успение на Пресвета Богородица, на 15 август, бидејќи турските власти не издале дозвола за богослужба на тој датум.
Поради тоа, богослужбата во Сумела беше преместена за 23 август, кога се одбележуваат Деветте дена по празникот.
На 15 август Вселенскиот патријарх Вартоломеј началствуваше со Светата Литургија во манастирот Панагија Фанеромени во Артаки, Кизик.
И годинава имаше реакции од одредени организации во Трабзон, кои побараа да биде повлечена дозволата за богослужбата во Сумела, повикувајќи се на музејскиот статус на манастирскиот комплекс. Меѓу оние што јавно реагираа беше и претседателот на синдикатот Türkiye Kamu-Sen во Трабзон, Џошкун Дилбер.
И покрај ограничениот број верници и отсуството на медиумите, Светата Литургија повторно беше отслужена во една од најзначајните православни светињи во историскиот Понт.
Панагија Сумела со векови претставува еден од најпрепознатливите духовни симболи на понтиското и поширокото православно ромејство, а повторното богослужбено присуство во нејзините древни ѕидини има особено духовно и историско значење.
Извор: romfea.gr
