На интернет-страницата на Московската епархија е објавен указ со кој протојереј Андреј Лоргус е лишен од свештенички чин. Одлуката е донесена врз основа на решение на Епархијалниот црковен суд од 23 декември 2025 година.
Во указот бр. У-02/23 од 20 февруари 2026 година, потпишан од патријархот Кирил, се наведува дека Лоргус е разрешен од свештениот чин поради прекршување на повеќе канонски правила: 6-тото правило на Трулскиот собор, 25-тото, 31-вото и 55-тото правило на Светите Апостоли, 16-тото правило на Првиот вселенски собор во Никеја, 3-тото правило на Четвртиот вселенски собор, како и 56-тото правило на Светите Апостоли.
Во образложението се наведуваат прекршоци како одделување од надлежниот епископ и создавање неовластени собири, самоволно напуштање на парохија и преминување во друга црковна јурисдикција, занимавање со световни работи, навредување клирици и нарушување на црковниот поредок.
Протојереј Андреј Лоргус (69) веќе неколку години живее во Бугарија, во пензија. Тој бил ставен во статус на мирување во Московската епархија уште во 2018 година. Во Москва служел во храмот на пророк Илија Обыденски, во храмот на Живоначалната Троица во Чертаново, во Високо-Петровскиот манастир, а неговото последно место на служење било храмот на свети Никола Мирликиски на Трите Гори.
Лоргус е познат како психолог и психотерапевт, поранешен декан на Факултетот за психологија при Рускиот православен универзитет „Св. Јован Богослов“, основач и ректор на Институтот за христијанска психологија и автор на повеќе книги од областа на христијанската психологија. Од 2003 година е член на Советот на Европското движење за христијанска психологија и антропологија.
Информацијата и придружниот коментар беа објавени од ѓаконот Андреј Кураев, кој во Русија има статус на „странски агент“, поради што објавата содржи и соодветна законска напомена.
Во својот коментар Кураев ја критикува одлуката, оценувајќи дека таа нанесува штета на самата Руска православна црква, и изразува став дека евентуална жалба би можела да биде разгледана од Вселенскиот патријарх.
Од Московската патријаршија, освен наведените канонски одредби во указот, засега нема дополнително образложение за одлуката.
Извор: Московска епархија
