Со голем успех и силен одзив од публиката продолжуваат проекциите на филмот „Свети Пајсиј“, кој досега го погледнале повеќе од 111.000 гледачи во Грција и Кипар.
Филмот ќе се прикажува во кината до 8 март, овозможувајќи им на уште повеќе гледачи да го проследат на големото платно. Според податоците од грчкиот box office, во првите четири недели од прикажувањето се продадени вкупно 111.166 билети.
Во првите две недели филмот се задржа на првото место на национално ниво. Само во периодот од 5 до 8 февруари 2026 година, продадени се 23.983 билети во 106 кино-сали. На премиерата (29 јануари – 1 февруари 2026) филмот привлече 38.167 гледачи во 129 сали низ земјата.
Филмот е базиран на популарната телевизиска серија „Свети Пајсиј – Од Фараса до Небото“, емитувана на телевизијата Mega, во продукција на Институтот „Свети Максим Грк“. Кино-верзијата содржи сцени кои не беа прикажани на телевизија, како и избрани моменти од серијата, нудејќи подлабоко и поцелосно филмско доживување.
Приходите од продажбата на билети ќе бидат донирани на здруженијата на семејства со повеќе деца, по одлука на Светата и Велика манастирска обител Ватопед и нејзиниот игумен, старец Ефрем.
За филмот
Филмот ја следи животната приказна на свети Пајсиј, роден како Арсениј Езнепидис во Фараса, Кападокија. По Лозанскиот договор, неговото семејство се преселува во Грција, каде што расте во Коница, Епир. Уште од детството во него се раѓа желбата за монашки живот.
Во 1945 година служи во армијата како радио-оператор. По отпуштањето ја посетува Света Гора, а во март 1953 година трајно заминува таму и стапува во манастирот Есфигмен. Подоцна во манастирот Филотеј станува монах и го добива името Пајсиј.
Филмот ги прикажува неговите духовни подвизи, престојот на Синај, враќањето на Света Гора, духовното раководење на монахињите во исихастирионот на свети Јован Богослов во Суроти, како и бројните сведоштва за чудата поврзани со неговото име. Прикажани се и последните денови од неговиот живот, болеста и упокојувањето во 1994 година, како и неговото канонизирање.
Во филмот настапуваат: Прокопис Агафоклеус, Никитас Цакиродоглу, Димитрис Ксантопулос, Христина Павлиду, Смарагда Смирнаиу, Христос Лулис, Јанис Станкоглу, Јоргос Арменис, Антонис Кацарис, Пајсиос Ексархос, Димитрис Имелос, Дросос Скотис, Деспина Гаџиу, Ринио Кириази, Костас Апостолакис и Марина Калогиру.
Сценариото е на Јоргос Цијакас, режијата на Стамос Цамис, а музиката ја потпишува Туомас Кантелинен. Продукцијата е на Институтот „Свети Максим Грк“.
Извор: orthodoxianewsagency.gr
