Новата телевизиска серија посветена на животот на Свети Јосиф Исихаст се очекува да ја има својата премиера во февруари 2027 година, откри кипарскиот актер и сценарист Јоргос Циакас, кој го потпишува сценариото на оваа продукција.
Гостувајќи во подкастот „Winter@LIKE“ на порталот like.com.cy, со водителот Хараламбос Химонас, Циакас зборуваше за снимањето, актерската екипа и предизвиците при создавањето на серијата, која ќе се емитува на телевизијата MEGA во Грција и на Alpha во Кипар.
Двајца актери ќе го толкуваат ликот на Свети Јосиф
Сценаристот откри дека животот на светителот ќе биде претставен низ две различни животни етапи.
„Го поделив ликот на два дела. Во неговите млади години го толкува Тасос Лекас, а од одреден момент улогата ја презема Арис Серветалис“, изјави Циакас.
Говорејќи за личноста на Свети Јосиф, сценаристот истакна дека станува збор за еден од големите светители на Православната црква.
„Свети Јосиф Исихаст е голем светител на Православието. Роден е на Парос во 1897 година, а се упокоил на Света Гора во 1959 година. Водел големи подвижнички борби и бил човекот кој ја обновил Света Гора, во смисла дека во тоа време се заборавила дури и Исусовата молитвата ‘Господи Исусе Христе, помилуј ме’. Тој бил човекот кој преку крвави подвизи ја стекнал молитвата и потоа им ја предал на своите ученици“, рече Циакас.
Снимање на Света Гора, во Атина и на грчките острови
За потребите на серијата, снимањата се одвивале на повеќе локации поврзани со животот на светителот.
„Многу снимавме во Атика, бидејќи старецот како млад го напуштил својот остров, дошол и работел во рудниците во Лаврион, а потоа во Атина бил уличен продавач. Подоцна заминал на Света Гора. Затоа имаме сцени од островот, од Атина и од Света Гора“, објасни сценаристот.
Според него, дури 90 проценти од снимањата се реализирале на отворено, често на тешко пристапни терени.
Особено предизвикувачко било снимањето на островот Тинос, каде што екипата се соочила со силни ветрови од седум до осум степени според Бофоровата скала.
„За среќа, имавме многу добар тон-мајстор и успеавме да снимаме и покрај тешкотиите што ги создаваше ветерот. Кога ќе ги видите сцените, ќе разберете дека сè се вееше. Се соочивме со различни проблеми, бидејќи деведесет проценти од снимањето е на отворено и на тешко пристапни места. Ќе видите. Сликата што доаѓа е навистина единствена“, изјави Циакас.
Арис Серветалис со целосно изменет изглед
Посебно внимание привлече и преобразбата на актерот Арис Серветалис за улогата на Свети Јосиф Исихаст.
На 13 октомври, за време на манифестацијата „Димитрија 2026“, во храмот „Свети Димитриј“, актерот се појави со долга коса и густа брада, поради што беше речиси непрепознатлив.
Серветалис учествуваше на дискусија посветена на духовниот етос во уметноста.
Премиера во февруари 2027 година
„Ако даде Бог, серијата ќе има премиера во февруари. Во Кипар ќе се емитува на Alpha“, откри Циакас.
Снимањето на серијата веќе е завршено, а продукцијата е дело на Институтот „Свети Максим“, со цел на телевизиската публика да ѝ го приближи животот, подвижништвото и духовното наследство на еден од најзначајните современи светогорски светители.
Извор: Vima Orthodoxias
