Премиерот Христијан Мицкоски соопшти дека се набавени 100 нови амбулантни возила, кои треба да придонесат за побрза и поефикасна интервенција на здравствените служби.
„Убеден сум дека со овие возила побргу ќе се стигнува и ќе се интервенира многу попрецизно, имајќи ја предвид опремата што ја поседуваат“, изјави Мицкоски, нагласувајќи дека инвестициите во здравството остануваат владин приоритет.
Тој најави дека во текот на следната година се очекува набавка на уште 50 амбулантни возила.
Нови болници во Штип, Тетово и Кичево
Премиерот информираше дека Владата, во соработка со Светската банка и Европската инвестициска банка, подготвува проекти за клиничката болница во Штип, клиничката болница во Тетово и Здравствениот дом со проширена дејност во Кичево.
Според најавите, формалното одобрување на финансирањето се очекува кон крајот на првиот квартал од 2027 година, по што би следувале тендерските постапки. Реализацијата на првиот проект би можела да започне кон крајот на вториот или почетокот на третиот квартал од следната година.
Нов клинички центар во Скопје
Мицкоски откри дека се разгледуваат две локации за изградба на новиот клинички центар во близина на болницата „8 Септември“, со цел поврзување со постојните здравствени установи, вклучително и ПЕТ-центарот и поликлиниката „Букурешт“.
Тој очекува преговорите за локацијата да завршат до крајот на годинава, а паралелно со Општина Карпош се работи и на обезбедување дополнителни паркинг-места.
Премиерот потсети и на набавките на возила за Министерството за внатрешни работи, „Пошта“ и општините, а најави и 150 нови електрични автобуси што ќе бидат распределени низ градовите во Македонија.
На крајот, Мицкоски им се заблагодари на здравствените работници, Министерството за здравство и сите институции вклучени во реализацијата на проектите, нагласувајќи дека Владата ќе продолжи со инвестиции за подобрување на условите во здравствениот систем.
Извор: Влада на Република Северна Македонија
