Во неодамнешно интервју за Viche, за украинска медиумска платформа фокусирана на православен дијалог, Архиепископот на Америка Елпидофор зборуваше за тековната руска инвазија врз Украина и нејзиното влијание врз православното единство. Тој потсети дека бројот на загинати, исчезнати и повредени меѓу двете земји веќе достигнува речиси два милиони.
Архиепископот Елпидофор ги повтори зборовите на Вселенскиот патријарх Вартоломеј, кој повеќепати истакнал дека раководството на Руската православна црква станало инструмент „за промоција на секуларните, воените, политичките и финансиските интереси на руската држава“.
„Ова е многу опасен пат“, рече Архиепископот. „Рускиот народ е верен народ. Тој не заслужува вакво црковно раководство. Тој заслужува Црква која е верна и ги следи учењата на Евангелието, на нашиот Господ Исус Христос и преданијата на Православната црква.“
Осврнувајќи се на неодамнешните непријателски изјави од почетокот на месецов од Руската служба за надворешно разузнавање (СВР), Архиепископот укажа на добро познатата историја на користење на Православието од страна на руската држава како средство на државната политика, како и на практиката на Московската патријаршија да врши политички притисок врз православните Украинци.
„За оние од нас кои навистина ја познаваат состојбата на Православието во Русија, овие изјави не беа изненадување“, рече тој. „Црквата отсекогаш била алатка на државата – уште од времето на царевите.“
Архиепископот истакна дека тврдењата на СВР, според кои Вселенската патријаршија посакувала нови поделби во Православието, само ја потврдуваат тенденцијата на руската држава да се меша во црковните прашања со цел остварување странско политичко влијание.
„За жал, една разузнавачка служба се меша во црковните работи“, нагласи Архиепископот. „Ние не сме секуларна организација, туку духовна. Ниту една држава нема право да ѝ диктира на Црквата што да прави. Мораме да го зачуваме светотаинското општење меѓу нас.“
Во 2019 година, Вселенската патријаршија ѝ додели Томос за автокефалност на Православната црква на Украина, по што за нејзин поглавар беше избран Митрополитот Епифаниј. Украинската православна црква под раководство на Митрополитот Онуфриј и понатаму номинално останува во јурисдикција на Московската патријаршија.
„Се разбира, Вселенската патријаршија е тука за да помогне во обновувањето на православното единство во Украина“, рече Архиепископот Елпидофор. „Украина е суверена и независна држава, со древна и добро организирана Црква. Но таа Црква беше поделена исклучиво поради притисоци одозгора – од Русија – кои беа политички, а не црковни по својата природа.“
Тој додаде дека дел од украинските епископи и свештеници не се приклучиле на Православната црква на Украина поради уцени, притисоци и закани од руски разузнавачки и безбедносни служби.
„Тоа е вистинската причина. Да бидеме отворени и искрени за она што навистина се случува“, рече Архиепископот.
Архиепископот Елпидофор говореше и за своите врски со украинскиот православен свет, потсетувајќи на својата посета на Украина заедно со блаженоупокоениот Митрополит Владимир, како и на посетата на Вселенскиот патријарх Вартоломеј на Украина во 2008 година, на покана на покојниот Патријарх Алексеј и тогашниот украински претседател Виктор Јушченко.
„Навистина ме боли да ја гледам денешната состојба со варварската инвазија на братската земја Украина од страна на Русија“, изјави Архиепископот. „Ја чувствувам болката на украинскиот народ, но и на сите мајки од двете страни кои ги губат своите деца во оваа војна.“
Извор: orthodoxtimes.com
