Неговата Светост Патријархот на Романија г.г. Даниил во неделата ја истакна одговорноста што секој човек ја има кон оние кои страдаат, нагласувајќи дека „нашето спасение зависи од односот што го имаме кон нив“.
Патријархот присуствуваше и сослужуваше на Светата Литургија која беше отслужена во историскиот параклис „Свети Георгиј“, во Патријаршиската резиденција во Букурешт.
Поглаварот на Романската Православна Црква, толкувајќи го Евангелието за Страшниот Суд, ја подвлече суштинската важност на помошта кон луѓето што во потреба.
„Никој не може да влезе во Царството Небесно ако го заобиколува ближниот што страда. На вратите на Царството Небесно ќе стојат како сведоци за нас оние кои ја примиле нашата помош кога биле во мака или во нужда, но и оние кои не ја добиле нашата помош – оние што сме ги заборавиле, превиделе, потцениле или отфрлиле“, истакна Патријархот Даниил.
Тој посочи на длабоката и таинствена врска меѓу смирението на Спасителот Исус Христос и Неговата слава. „Неговото смирение се пројавува во почитувањето на слободата на секој човек, а Неговата слава во праведното наградување на милосрдната љубов што човекот ја покажува кон своите ближни“, нагласи Патријархот.
Во завршниот дел од својата беседа, Патријархот на Романија повика на смирение, покајание и милосрдна љубов во пресрет на претстојниот Велигденски пост (Светата и Голема Четириесетница).
„Да ги соединиме смирената молитва и искреното покајание со делотворна љубов, покажувајќи и духовна и материјална милост кон луѓето што се во потреба“, порача Патријархот Даниил.
Извор: basilica.ro
