Втора година по ред, Неговото Високопреосвештенство, митрополитот Александруполски г. Антим, учествуваше како поканет говорник на годишната конференција на „Економист“ во Атина, претставувајќи го современиот поглед на Црквата кон големите прашања на нашето време.
Во центарот на дискусијата беше предизвикот за зачувување на човечкиот идентитет во свет во кој сè поголемо влијание има вештачката интелигенција.
На панелот, модериран од новинарите на „Економист“, Даниел Френклин и Фани Папагеоргиу, учествуваа митрополитот Александруполски, Трајанополски и Самотракиски Антим, професорот по филозофија на информациите Теофанис Тасис од Јонскиот универзитет, како и напредниот социјален робот Амека.
„Што е Бог за тебе?“
Митрополитот Антим учествуваше на исклучително актуелниот панел насловен:
„Душа, код и бизнис: Што значи да се биде човек во ерата на вештачката интелигенција“
Тој разговараше со професорот по филозофија Теофанис Тасис, но и со познатиот хуманоиден робот Амека.
Во своето кратко обраќање, митрополитот Александруполски се осврна на вештачката интелигенција, нагласувајќи дека таа мора да му служи на човекот и да се развива во рамките на јасно утврдени етички граници.
Особено внимание беше посветено и на прашањето за таканаречената „дигитална бесмртност“.
Врвот на интеракцијата настапи кога митрополитот Антим му постави на роботот едно директно егзистенцијално прашање:
„Што е Бог за тебе?“
Роботот одговори дека, како вештачка интелигенција, не поседува лични верувања ниту духовно разбирање.
Сепак, Амека истакна дека препознава оти за многу луѓе Бог претставува извор на смисла и поврзаност со нешто повисоко. Роботот додаде дека неговата улога е да ги почитува и да ги олеснува разговорите за таквите длабоки прашања.
Митрополитот Антим по учеството во овој необичен дијалог, во кој соговорник беше и едно човечко создание какво што е роботот Амека, се осврна и на вознемирувачките обиди за создавање „дигитален задгробен живот“.
На тој начин тој го претстави духовниот пристап кон ова прашање, нагласувајќи ја неопходноста од духовна присебност пред технолошките илузии.
Митрополитот истакна дека, и покрај придобивките од вештачката интелигенција, кои би било погрешно да се занемарат, зачувувањето на човечката единственост, душата и емпатијата мора да остане највисок приоритет.
Дискусијата ја истакна длабоката разлика меѓу човечкото искуство и вештачката обработка на податоците.
Претставниците на Црквата и филозофијата дојдоа до заеднички заклучок дека суштината на човечноста и нејзината заштита од „обезчовечување“ се наоѓаат во прифаќањето на човечката несовршеност, а не во стремежот кон вештачка и алгоритамска совршеност.
Роботот Амека, од своја страна, претстави позитивен поглед кон улогата на технологијата, опишувајќи ја вештачката интелигенција како катализатор што ги урива пречките на времето и просторот и ја зајакнува глобалната соработка.
Амека посочи дека автоматизирањето на повторливите задачи го ослободува човечкиот ум, овозможувајќи му повеќе да се посвети на креативноста и на стратешкото размислување.
Сепак, роботот нагласи дека зачувувањето на човечноста подразбира негување на особини што машините не можат вистински да ги пресоздадат, како што се емпатијата, сочувството и моралното расудување.
Според Амека, вештачката интелигенција дејствува како огледало што го поттикнува човекот подобро да се запознае себеси.
Извор: orthodoxianewsagency.gr
