Комисијата за односи со верските заедници со предлог до Министерството за образование и Владата — верското образование да биде дел од задолжителната наставна програма од прво одделение па сè до крајот на средното образование.
Предлогот е поддржан од сите пет уставно признаени верски заедници во Македонија, како и од Асоцијацијата на вероучители. Според директорката на Комисијата за односи со верските заедници, Оливера Трајковска, овој предлог го вклучува верското образование во предметите етика, етика на религии и културно и религиозно наследство.
„Почитувањето на моралните норми на кои пред сè учи верското образование може само да биде од полза за општеството, а во никој случај на штета,“ изјави Трајковска, додавајќи дека вероучителите трпат голема штета изминатата деценија поради законските измени во образованието.
Од Министерството за образование и наука за ТВ 24 велат дека предлогот ќе се разгледува наредната недела:
„Предлогот е примен во Министерството. Наредната недела ќе имаме состаноци на кои ќе се дискутира и разгледува истиот.“
Во духот на соживот и заедништво, денеска на заедничко утринско кафе седнаа Архиепископот г.г. Стефан, Реисот ул Улема Шакир ефенди Фетаи од ИВЗ, претседателот на Еврејската заедница Пепо Леви, бискупот на Католичката црква монсињор Киро Стојанов и пасторот на Евангелистичко-методистичката црква Марјан Димов.
Од Комисијата истакнаа дека верските лидери меѓусебно имаат блиски односи, преку кои можат да разговараат за горливи прашања без да се создаде тензија — а нивниот пример, велат, го следат младите верници.
„Конфликтите во нашето општество се политички сценарија. Ниту една вера не промовира насилство и поделби,“ порачаа од Комисијата за денешното заедничко кафе помеѓу верниците од петте уставно признаени верски заедници.
Извор: ТВ 24 / 24.mk
