Скопје ќе биде обвиено во молитвена радост оваа сабота, 20 септември 2025 година, кога ќе се одржи традиционалната литија во чест на Рождеството на Пресвета Богородица – Мала Богородица.
Според најавите од храмот Рождество на Пресвета Богородица во центарот на главниот град, празнувањето ќе започне во 17:00 часот со празнична вечерна богослужба, на која ќе биде присутна и чудотворната икона Пресвета Богородица – Троеручица, донесена како благослов за верниот народ.
По завршувањето на богослужбата, ќе следи свечена литија низ централните улици на Скопје, во која ќе учествуваат свештенството, монаштвото и илјадници верници. Литијата претставува израз на љубов, благодарност и молитва кон Мајката Божја за здравје, мир и благослов врз целиот народ.
Овој настан е едно од најзначајните духовни собранија во македонската престолнина, а секоја година привлекува голем број верници кои со свеќи, молитви и песна го чествуваат празникот на Богородица.
