Српскиот патријарх г.г. Порфириј на 25 октомври 2025 година во селото Дежева, родното место на Свети Сава, ја освети новоизградената црква посветена на првиот Архиепископ на Србија, и отслужи Архиерејска Божествена Литургија.
Овој свет чин и свечен настан во новоизградената светиња го одбележа големиот јубилеј на Српската Православна Црква – 850 години од раѓањето на Свети Сава, првиот архиепископ, просветител и творец на духовниот и културниот идентитет на српскиот народ.
Беседата на Патријархот Порфириј
Во својата беседа по читањето на Светото Евангелие, Патријархот Порфириј, меѓу другото, рече:
„Еве благослов за сите нас! Се наоѓаме во нашето родно место, зашто тука се роди Оној кој нè роди – Оној што нè роди преку Светиот Дух, што нè роди во Христа и за вечен живот. Тој нè обликува како разумен народ, народ што го носи печатот на Христос и зборот на Неговото Евангелие – збор што создава духовна култура, живот во Христа, култура измиена во Евангелието, култура на Православието.
Да живееме според словото на Свети Сава, зашто тоа значи да живееме во Христа, според Божјите заповеди, кои се содржани во двојната заповед за љубовта – заповедта за заедништво. Љубов кон Бога со целото свое битие и љубов кон ближниот како кон себе си – тоа е заповедта за заедништво. Човекот е создаден како битие на заедништво, според образот и подобието Божјо – како битие на љубов.“
На крајот од својата беседа, Патријархот им честиташе на сите присутни и изрази молитвена желба, преку молитвите на Свети Сава, српскиот народ секогаш да биде народ на љубов, на заедништво и на Христос, а не на омраза и себичност.
Завршен збор
На крајот од службата, Митрополитот на Рашко-Призренската епархија г.г. Теодосиј се заблагодари на Патријархот и на сите архиереи и верници кои придонеле за изградбата и осветувањето на црквата на Свети Сава во Дежева.
Извор: spc.sr
