Вашингтон, 14 септември 2025 – Неговата Сесветост Вселенскиот Патријарх Вартоломеј во неделата вечер започна со својата осма апостолска посета на Соединетите Американски Држави, со пристигнувањето во главниот град Вашингтон.
Во име на американскиот претседател Доналд Трамп, официјален пречек му упатија заменик-шефот на Протокол на САД, Еби Џоунс, како и заменик-државниот секретар Мајкл Џ. Ригас. Од страна на Грчката православна архиепископија на Америка, добредојде му посака Неговото Високопреосвештенство архиепископот Елипидофор на Америка.
На свеченоста присуствуваа и амбасадорот на Грција во САД, Екатерини Насика, заменик-шефот на мисијата при Турската амбасада во Вашингтон, Мурат Угурлуоглу, како и духовниот советник на Архонтите на Вселенската Патријаршија, протопрезвитер Александар Карлуцос.
Добредојде на Патријархот му изразија и митрополитот Апостол од Њу Џерси, епископот Атинагор од Назјанз и епископот Нектариј од Диоклеја, заедно со д-р Ентони Џ. Лимберакис, национален командир на Архонтите, и почесниот Б. Теодор Бозонелис, поткомандир на Архонтите.
Темплтонова награда
За време на посетата, Вселенскиот Патријарх ќе ја прими престижната Темплтонова награда, која ќе му биде врачена на 24 септември во Њујорк. Наградата се доделува во чест на неговите „пионерски напори за поврзување на науката и духовноста во разбирањето на односот на човештвото со природата и за обединување на луѓе од различни вери во повикот за грижа за созданието“.
Средби и активности
Програмата на Патријархот опфаќа посети во Вашингтон, Њујорк и Саутхемптон (Лонг Ајленд). Во престолнината тој ќе оствари средби со претседателот Доналд Трамп, со претседателот на Претставничкиот дом Мајкл Џонсон, конгресменот Гус М. Билиракис и други државни лидери, како и со амбасадорите на Грција и Турција.
Патријархот ќе положи венец и на Гробот на Незнајниот Војник во Арлингтонските национални гробишта.
Во среда, 17 септември, во црквата „Света Екатерина“ во Фолс Чрч, Вирџинија, ќе се одржи свечена доксологија, каде што верниците ќе можат да добијат благослов од Неговата Сесветост.
Извор:archons.org
