Вселенски патријарх Вартоломеј утрово ја посети болничката црква „Св. Пантелејмон“ во рамките на Хипократова болница, каде што им се обрати на присутните за грижата и љубовта на Мајката Црква кон болните и страдалниците, со особено внимание кон децата.
Обраќајќи се во црквата пред медицинскиот и негувателскиот персонал, како и пред роднините на пациентите, патријархот истакна дека Црквата им служи на луѓето преку задоволување на духовните потреби, додека медицината ја олеснува телесната болка. Тој нагласи дека меѓу двете нема спротивставеност и дека верата и науката дејствуваат во склад за спасението и благосостојбата на човечката личност.
„Одиме заедно. Нема ривалство меѓу науката и религијата, нема ривалство меѓу науката и христијанската вера“, изјави Вселенскиот патријарх.
Патријархот се осврна и на децата што страдаат од сериозни болести, како што е леукемијата, нагласувајќи ја нивната потреба од медицинска грижа и емоционална поддршка. Воедно, ја пофали посветената и самопожртвувана работа на лекарите и медицинските сестри од Педијатриската клиника.
Потоа следеше свечена хиротонија на свештеник од Митрополијата на Солун, по што патријархот ги посети просториите на Педијатриската клиника, Педијатриското одделение и Одделението за педијатриска онкологија во Хипократовата болница.
Вселенскиот патријарх беше придружуван од митрополитот Филотеј Солунски, заменик-министерот за внатрешни работи за Македонија–Тракија Костас Ѓулекас, заменик-министерот за развој Ставрос Калафатис, заменик-министрите за здравство Мариос Темистоклеус и Димитрис Варџопулос, како и од управителот на Хипократовата болница Николаос Антонакис.
Избор: orthodoxtimes.com
