Вселенскиот патријарх г.г. Вартоломеј се осврна на војните што го потресуваат светот, истакнувајќи дека човештвото поминува низ голема криза и дека денес повеќе од кога било е потребна заштитата на Пресвета Богородица.
Патријархот ги даде овие изјави по завршувањето на богослужбата на Втората статија од Акатистот кон Пресвета Богородица, која беше отслужена во Патријаршискиот храм „Св. Георгиј“ во Фанар во петок, 6 март 2026 година. На богослужбата началствуваше митрополитот Филаделфиски г. Мелитон, додека проповедта ја одржа архимандритот о. Јаков.
Во своето кратко обраќање по службата, Патријархот се осврна на конфликтите што го потресуваат светот.
„Човечкиот род денес минува низ голема криза поради војните што се водат насекаде – во Европа, во Украина веќе четири години, како и на Блискиот Исток, каде што избувна нова војна. Повеќе од кога било имаме потреба од поддршката на божествената заштита – од заштитата на Пресвета Богородица, која е вистинската Мајка на човечкиот род“, истакна тој.
„Вие сте продолжение на Вселенската патријаршија“
Патријархот со срдечност ги поздрави и поклониците од регионот Источна Македонија и Тракија.
„За жал, овде во Градот имаме малку верници. Кога доаѓаат поклоници од Грција или од други места и ги исполнуваат нашите храмови, тоа ни носи особена радост, трогнатост и задоволство“, рече тој, заблагодарувајќи се на заменик-регионалната управителка г-ѓа Бахариду и замолувајќи да ги пренесе неговите поздрави и татковска љубов до регионалниот управител и до сите жители на регионот.
„Вие, сте продолжение на Вселенската патријаршија. Вие сте духовни чеда на митрополиите од таканаречените Нови Земји, кои иако административно беа предадени на Црквата на Грција пред речиси сто години, во 1928 година, сепак остануваат канонска територија на Вселенската патријаршија. Затоа во тие митрополии секогаш се спомнува името на актуелниот Вселенски патријарх“, нагласи тој.
Молитва за мирен Велигден
Патријархот исто така ги поздрави учениците и професорите од Првата гимназија во Јаница.
Тој потсети дека во Јаница бил во 1999 година, за време на својата прва патријаршиска посета на Грција, кога заедно со тогашниот архиепископ Христодулос посетиле повеќе митрополии во северна Грција, меѓу кои и Митрополијата Едеса и Пела, во чиј состав се наоѓа Јаница.
Патријархот особено го пофали протојерејот о. Јован Спиридис, истакнувајќи го неговото значајно духовно и социјално дело, како и списанието „Ек ватхеон“, кое го издава.
„Кога ќе се вратите, пренесете им ги нашите поздрави и благослови од Фанар на сите жители на Јаница, особено на вашите соученици и професори, како и на отец Јован, чија работа со љубов и интерес ја следиме“, рече Патријархот.
На крајот, тој се помоли Бог да му дарува на светот мир.
„Нека нè удостои Бог да прославиме мирен Велигден. Дај Боже, војните што беснеат и на Исток и на Запад да завршат до Велигден. Нека дојде мирот Христов во нашите срца и во целиот свет. Амин“, порача Вселенскиот патријарх.
Извор: orthodoxianewsagency.gr
