Манастирот посветен на Свети Порфириј во Газа го прослави својот заштитник и покровител. Овој древен православен манастир, кој во тешките години на војната стана прибежиште за илјадници луѓе – христијани и нехристијани – повторно беше место на молитва и надеж.
Манастирот, кој во изминатите години се најде и на мета на напади, успеа да опстане во исклучително тешки услови. Со Божја помош, тој продолжува да ја извршува својата духовна и хуманитарна мисија.
На Втората недела од Великиот пост, на 8 март 2026 година, беше одбележан празникот на Свети Порфириј, епископ Газа, кој живеел од 347 до 420 година. Според информациите од Патријаршијата на Ерусалим, Свети Порфириј потекнувал од Солун и бил ракоположен за епископ од епископот на Ерусалим Прајлиј. Со својата мисионерска дејност тој одиграл клучна улога во утврдувањето на христијанството во Газа, каде што ја надминал паганската традиција и поставил темели на црковниот живот кој се развивал со векови.
Манастирот успеал да ја преживее и тешката тригодишна воена криза, при што служел како вистинско засолниште за околу триста православни христијани, но и за луѓе од други вероисповеди. Таму им било обезбедено сместување, храна и основна грижа за сите нивни потреби.
Со Божествената литургија претседаваше Архиепископот на Тиверијада, г. Алексиј, со благослов на Патријархот Ерусалимски г.г. Теофил, во сослужение со архимандритот Силас. На богослужбата молитвено учествуваа и верниците кои биле спасени и згрижени во манастирот.
Овој манастир денес претставува симбол на верата, милосрдието и човечката солидарност во еден од најтешко погодените региони на Блискиот Исток.
Извор: orthodoxianewsagency.gr
