Ерусалимскиот патријарх Теофил III денеска во седиштето на Ерусалимската патријаршија го прими Милорад Додик, поранешен претседател на Република Српска, со кого разговарал за положбата на христијаните во Светата Земја, последиците од војната и историските врски со Српската православна црква.
Додик на средбата бил придружуван од амбасадорот Душко Ковачевиќ и делегација.
Патријархот Теофил III ја оценил посетата како обновување на историските односи меѓу Православната црква во Ерусалим и Српската православна црква и со особена топлина зборувал за српските верници кои продолжуваат да ги посетуваат светите места.
Во разговорот тој посочил дека христијанското присуство и богослужбениот живот во Светата Земја траат веќе 2.000 години, нагласувајќи дека христијанската надеж ја црпи својата сила од Христовото Воскресение.
Според него, тоа истовремено ѝ дава на Црквата постојана одговорност да работи на зачувување на мирот и заштита на христијанското наследство во Светата Земја.
Теофил III се осврнал и на последиците од војната, која сериозно ги нарушила поклоничките патувања кон светите места. Тој посочил дека тоа претставува голем товар и за семејствата чија егзистенција директно зависи од поклоничкиот туризам.
Милорад Додик, пак, зборувал за својата заложба за мир, како и за загриженоста поради војната меѓу Русија и Украина и страдањата што таа ги предизвикува.
За време на средбата, претставниците на Ерусалимската патријаршија му предале на Додик документи во кои се прикажани предизвиците со кои се соочува Православната црква во Светата Земја.
Од Патријаршијата воедно му се заблагодариле за неговата подготвеност финансиски да ги поддржи работата и пастирската мисија на Ерусалимската патријаршија, како и зачувувањето на христијанското присуство во регионот.
Извор: orthodoxianewsagency.gr
