Јордан започна обемен проект за развој на областа околу местото на Крштевањето на Исус Христос – Ал-Магтас, со вкупна вредност од околу 120 милиони долари, во пресрет на 2.000-годишнината од Христовото Крштевање, која ќе биде одбележана во 2030 година.
Проектот има за цел годишно да привлече околу еден милион поклоници и посетители и да ја претвори областа во едно од најзначајните христијански поклонички места во светот.
Јорданската влада потпиша четири договори кои опфаќаат изградба на музеј, создавање целосно поклоничко село, унапредување на инфраструктурата и создавање зелена еколошка рута.
Проектот ќе се развива на површина од околу 1.400 акри, веднаш до историскиот локалитет Ал-Магтас, на источниот брег на реката Јордан.
Светско наследство на УНЕСКО
Планот има за цел дополнително да го истакне значењето на областа, истовремено зачувувајќи го нејзиниот верски и историски карактер.
Локалитетот од 2015 година е вклучен на Листата на светско наследство на УНЕСКО.
Договорите беа потпишани под покровителство на јорданскиот премиер Џафар Хасан, во рамки на спроведувањето на насоките на кралот Абдула Втори, кој ја поддржува иницијативата на Советот на верските лидери на Јордан за одбележување на годишнината во 2030 година.
Музеј на Христовото Крштевање и поклоничко село
Инвестицијата е распределена на неколку главни проекти:
- 50 милиони долари за проектирање и изградба на Музејот на Христовото Крштевање;
- 40 милиони долари за селото за поклоници и посетители;
- 27 милиони долари за патната мрежа, водоснабдување, десалинизација, наводнување, електрична енергија и соларни системи;
- 3 милиони долари за создавање зелена рута.
Музејот ќе се простира на површина од 5.500 квадратни метри и преку современи изложбени средства ќе го претставува верското, историското и археолошкото значење на локалитетот.
Поклоничкото село ќе вклучува центар за прием на посетители, хотел, ресторани, продавници, црква, јавни простори и други придружни услуги.
На овој начин, посетителите ќе можат подолго да престојуваат во областа, наместо локалитетот да го посетуваат само во рамки на кратки организирани посети.
Зелен развој и заштита на природата
Кралското друштво за заштита на природата на Јордан ќе биде задолжено за проектирање на зелената рута.
Таа ќе вклучува пешачки патеки, проширување на вегетацијата и мерки за заштита на биолошката разновидност.
Проектот ќе ги следи и препораките на УНЕСКО за зачувување на природната средина околу историскиот локалитет.
Според предвидениот распоред, подготвителните работи треба да започнат кон крајот на првиот квартал од 2027 година, додека главните градежни работи се планирани за вториот квартал од истата година.
Завршувањето на проектите е предвидено за првиот квартал од 2029 година.
Едно од најзначајните христијански места
Локалитетот официјално е познат како „Витанија отаде Јордан“ и содржи остатоци од древни цркви, крштелници и конаци за монаси и поклоници.
Според христијанското предание, токму на ова место Свети Јован Крстител Го крстил Исус Христос во реката Јордан.
По мировниот договор меѓу Јордан и Израел во 1994 година, следувале деминирање на областа и археолошки ископувања, а локалитетот систематски бил отворен за јавноста во 2002 година.
Во изминатите години местото го посетиле повеќе папи и други верски лидери, а денес претставува една од клучните точки на верскиот туризам во Јордан, заедно со планината Нево, Мадаба и Махерон.
Јорданската влада нагласува дека сите нови објекти ќе бидат изградени надвор од археолошките граници на споменикот, со цел целосно да се зачуваат неговата духовна, историска и археолошка вредност.
Со овој проект, Јордан не се подготвува само за одбележувањето на големиот јубилеј во 2030 година, туку настојува да создаде трајна светска христијанска поклоничка дестинација со значајно место во верскиот туризам во децениите што следуваат.
Извор: Sky News Arabia
