Со свечени богослужби на гората Тавор, Ерусалимската патријаршија на 19 август го прослави празникот Преображение Господово според стариот календар.
На Вечерната богослужба чиноначалствуваше Митрополитот на Акра – Птолемаида г. Макариј, додека на сеноќното бдение и Божествената Литургија началствуваше Ерусалимскиот патријарх г.г. Теофил, во сослужение со повеќе архиереи и свештенослужители. На богослужбата присуствуваа локални верници и поклоници, како и претставници на дипломатски мисии од православни земји.
Во својата проповед, патријархот Теофил потсети на евангелскиот настан на Тавор, каде Христос се преобразил пред апостолите Петар, Јаков и Јован, а покрај
Него се појавиле пророците Мојсеј и Илија. Тој нагласи дека Преображението ги подготвило учениците за Христовото страдање и Воскресение, но истовремено претставува и откривање на Неговата Божествена слава и предобраз на Второто Христово доаѓање.
Осврнувајќи се на учењето на Светите Отци, патријархот говореше и за Таворската светлина, нагласувајќи дека светителите учествуваат во Божјата слава по благодат, додека Отецот, Синот и Светиот Дух ја поседуваат по природа.
Божествена Литургија беше отслужена и во обновениот храм на Тавор, каде началствуваше Митрополитот Назаретски г. Киријак. Празникот беше одбележан и во храмот „Преображение“ во Рамала, како и кај Богородичниот Гроб во Гетсиманија, каде беше отслужена повеќеархиерејска Литургија.
Извор: orthodoxianewsagency.gr
