Македонската државно-црковна делегација, предводена од претседателот на Собранието Африм Гаши, во Рим му оддава почит на свети Кирил, во рамки на традиционалното чествување на светите браќа Кирил и Методиј.
Централниот дел од програмата се одржува во базиликата „Сан Клементе“, каде што свештенослужители на Македонската православна црква – Охридска архиепископија, предводени од Архиепископот охридски и македонски г.г. Стефан, служат молебен на гробот на свети Кирил. По молитвениот чин, делегацијата положува венец свежо цвеќе во знак на благодарност и почит кон сесловенскиот просветител.
Во состав на делегацијата се претставници на Собранието, Министерството за култура и туризам, како и црковна делегација на МПЦ-ОА. Во рамки на посетата на Рим и Ватикан, делегацијата има и активности во базиликата „Санта Марија Маџоре“, поврзани со споменот на светите браќа и со историското осветување на словенските книги во IX век.
Поклонението на гробот на свети Кирил во Рим е едно од централните македонски чествувања по повод 24 Мај – Денот на сесловенските просветители, празник што во Македонија се одбележува како државен празник од 2007 година.
