Со длабока трогателност и сцени кои тешко се опишуваат со зборови, Неговата Светост Папата и Патријарх Александриски и на сета Африка, г.г. Теодор II, ја посети областа Туркана во северна Кенија – една од најсиромашните и најтешко погодени области во светот, носејќи ја пораката на Христовата љубов, надеж и татковска грижа за луѓето кои секојдневно живеат во сиромаштија и страдање.
На 27 мај, Патријархот пристигнал од Најроби во Светата Митрополија Елдорет и Северна Кенија, ова доаѓа од неговата желба да биде близок не само до локалната православна заедница, туку и до секој човек во регионот, без разлика на племето или верата.
Пречекот што му го приредиле жителите на Туркана бил исклучително емотивен. Голем број луѓе, деца, мајки и старци – многумина боси – го поздравиле Патријархот со песни, традиционални танци и солзи радосници. Во суровата и сушна африканска земја, неговото присуство претставувало жива потврда дека Православната Црква не ги заборава своите чеда и дека Христовата љубов стигнува и до најзаборавените места на светот.
Во рамките на посетата биле извршени и осветувањата на храмот посветен на Свети Георгиј Победоносец, донација од Orthodox Christian Mission Center од Америка, а потоа била отслужена свечена Патријаршиска Божествена Литургија со сослужение на архиереи и свештенослужители од Кенија и Уганда.
За време на Литургијата бил ракоположен нов ѓакон, отец Георгиј, за потребите на локалната мисионерска дејност. Патријархот истакнал дека во Африка свештенството не е привилегија, туку жртва, служење и секојдневно распнување за човекот кој страда.
Обраќајќи им се на жителите на Туркана, Патријархот Теодор II порача:
„Нашата Света Црква не заборава ниту еден човек. Денес дојдов овде не како владетел, туку како татко. Дојдов да ви кажам дека Бог ве љуби, дека не сте сами и дека Африка е во срцето на Александриската Патријаршија.“
Тој особено се заблагодарил на Orthodox Christian Mission Center за постојаната поддршка на мисионерската работа на Александриската Патријаршија во Африка, благодарение на која се реализираат дела на живот и надеж во најсиромашните делови на континентот.
Следна станица од посетата била областа Лодвар, каде што Патријархот ги осветил просториите на новиот Мисионерски центар, кој исто така е донација од Orthodox Christian Mission Center. Центарот ќе служи како место за духовна, хуманитарна и образовна поддршка за стотици семејства во регионот.
Денот завршил во атмосфера на силни емоции, со жителите на Туркана кои го испратиле својот духовен отец со песни, солзи и молитви. И навистина, во тишината на африканската пустина, таму каде што светот често заборава, Православната Црква уште еднаш сведочеше дека каде што е Христос – таму има љубов, вера, надеж и жртва.
Извор: orthodoxianewsagency.gr
