Во недела, 16 ноември 2025 година, со почеток во 21:00 часот, на православниот телевизиски канал Pemptousia TV ќе се емитува премиерно на нивната програма филмот „Човекот на Бога“ (Ο Άνθρωπος του Θεού / Man of God) — инспириран од животот на Свети Нектариј Егински.
Филмот, кој оригинално беше објавен во 2021 година, низ трогателна приказна го прикажува животниот пат на светецот кој станал жртва на неправди, омраза и клевети од своите противници. И покрај страдањата и искушенијата, Свети Нектариј останува пример на вера, смирение и љубов кон Бога и луѓето.
Во главната улога блеска Арис Серветалис, со извонредна интерпретација на ликот и духот на светецот. Во филмот учествуваат и Христос Лулис, Кариофила Карамбети, Никитас Чакиролу, Герасимос Скиадареси, Јанис Станкоглу, Тониа Сотиропулу, Манос Гаврас, Тања Трипи, Мартилa Сварна, како и Александар Петров и Мики Рурк.
Авторка на сценариото и режисерка е Јелена Поповиќ, а продукцијата е на Институтот „Св. Максим Гркот“ и Simeon Entertainment.
Филмот ќе се емитува ексклузивно на православниот интернет канал Pemptousia TV, поврзан со Светата Гора (Атон) и Институтот „Св. Максим Гркот“, кој се посветува на духовноста, културата и образованието во православниот свет.
Извор: Orthodoxia News Agency – Премиера на филмот „Човекот на Бога“ на Pemptousia TV
