Патријаршијата од Москва започна систематска офанзива против различните облици на нео-паганизам кои сè повеќе се шират во Русија. Особено на удар се групите познати како родновери – „родни верници“, кои се повикуваат на претхристијанската руска духовност – како и следбениците на скандинавскиот политеизам Асатру.
Според патријаршијата, ова е еден од најсериозните предизвици во современата мисионерска дејност, дури посериозен од конкуренцијата на традиционалните религии присутни меѓу мигрантите, како исламот и будизмот.
Поради тоа, по иницијатива на Патријарх Кирил, формирана е специјална комисија составена од претставници на 12 синодални оддели. Комисијата е предводена од рускио-францускиот архиепископ Савва (Тутунов), кој се смета за еден од највлијателните членови на тимот на Патријархот.
Комисијата веќе го одржа првото заседание во почетокот на октомври. Во официјалниот извештај објавен на веб-страницата на Патријаршијата се наведува дека меѓу приоритетните задачи се подготовка на научни и методолошки материјали, организирање обуки и едукативни програми, како и развивање мерки за спротивставување на „деструктивното влијание на нео-паганските учења“.
Новината е, како што се истакнува, систематскиот пристап. Иако активностите против нео-паганизмот не се нови, од сега во процесот се вклучени и други структури на Патријаршијата. Одделот за мисија веќе има секретаријат за „апологетска мисија“ кој се занимава со анализирање на секти, псевдо-православни учења, деструктивни субкултури и различни култови, со цел развивање на апологетски одговори.
Патријарх Кирил предупредува дека денес „сме сведоци на обиди за искривување на минатото и замената на автентичната духовна традиција со вештачки конструирани сурогати“. Тој смета дека нео-паганизмот им се претставува на младите како „повеќе историска, природна и навистина национална форма“, но всушност станува збор за „еклектична мешавина од фантазии и елементи од други култури“.
Во оваа „псевдо-култура“, според Кирил, особено се нагласува култот кон силата, што може да влијае врз младите и да создава етнички затворени групи со агресивни тенденции. Патријархот предупредува и на поврзаноста на одредени етнички дијаспори со „брутален политеизам“, па дури и со радикален исламизам, што бара и вмешување на органите на редот.
Сепак, не сите експерти веруваат дека новата комисија ќе донесе значајни промени. Професорот Роман Шиженски од Центарот за етнички и религиски студии при Универзитетот во Санкт Петербург смета дека само „автентична мобилизација“ на црковните институции со вистинска мисионерска работа – која не се сведува на идеолошки оценки – може да го сопре растот на нео-паганизмот. Во спротивно, предупредува тој, Руската Православна Црква ризикува да биде доживувана како „државен култ“, за кој младите ќе бараат алтернатива, дури и во „култот на сила“ и радикалниот национализам.
Извор: asianews.it
